शव ल्याउन काठमाडौंबाट पोखरा गए थुप्रै शववाहन

हिजो बिहान पोखरामा भएको यति एयरलाइन्सको एटिआर विमान दुर्घटनामा निधन भएकाहरुको शव लिनका लागि काठमाडौं उपत्यकाबाट एम्बुलेन्स तथा शववाहन पठाइएको छ । आज बिहानसम्म फेला पारिएकामध्ये पहिचान हुन नसकेका,विदेशी नागरिक र पोखरा क्षेत्रभन्दा बाहिरका यात्रुको शव काठमाडौं ल्याउनका लागि एम्बुलेन्स तथा शववाहन पोखरा गएका हुन् । 

उपत्यकाभित्रका विभिन्न ठाँउबाट आठ वटा गाडी पोखरा गएको बताइएको छ । शंखरापुरबाट एक, ललितपुरबाट १, नागार्जुनबाट एक, चाँगुनारायणबाट एक, सूर्यविनायकबाट एक, भक्तपुरबाट एक एम्बुलेन्स घटनास्थलमा गएका छन् । त्यस्तै, सशस्त्र प्रहरी बलका दुई वटा एम्बुलेन्स शव ल्याउनका लागि खटिएको छ ।

यता, काठमाडौंबाट दुई जना फरेन्सिक चिकित्सकको टोली पोखरा पठाउने तयारी भइरहेको छ । चार जना चालक दलका सदस्यसहित विमानमा सवार ७२ जनामध्ये हालसम्म भेटिएका सबै ६९ जना मृत घोषित भइसकेका छन् ।