सामुदायिक विद्यालयका शिक्षकले छोराछोरी बोर्डिङ पठाए तलब नपाउने

नुवाकोटको सूर्यगढी गाउँपालिकाले सामुदायिक विद्यालयमा अध्यापन गर्ने शिक्षक शिक्षिकाले आफ्ना छोराछोरीलाई बोर्डिङ स्कुलमा पढाउन नपाउने नियम बनाएको छ । 

सरकारी तलब र सुविधा लिने शिक्षकहरुले आगामी शैक्षिक सत्रदेखि विद्यालय तहमा अध्ययनरत आफ्ना सन्ततिलाई सामुदायिक विद्यालयमा भर्ना गर्नुपर्ने गाउँपालिकाको निर्णय छ । शिक्षकहरुले आफ्ना सन्तानलाई अन्य विद्यालयमा लगेर पढाउने र सामुदायिकमा पढ्ने विद्यार्थीको शिक्षामा खासै चासो नदिने गुनासो बढेकाले यो निर्णय गर्नुपरेको गाउँपालिका प्रमुख सन्तबहादुर घलेले बताए । 

सामुदायिक विद्यालयमा शैक्षिक गुणस्तर घट्दै गएको उनको भनाइ छ । ‘सामुदायिक विद्यालयमा शैक्षिक गुणस्तर खस्कँदो छ । जनताले तिरेको करबाट तलब खाएका शिक्षकले विद्यार्थी पढाउँदै पढाउँदैनन्’, उनले भने,‘अभिभावकहरुको पनि धेरै गुनासो आयो । आफ्ना छोराछोरी संस्थागतमा राखेर अर्काको छोराछोरीको भविष्य बिगार्न पाइएन् नि !’

गाउँपालिकाको निर्णय नटेर्ने शिक्षकको तलबभत्ता र सेवासुविधा रोक्का गरिने चेतावनीसमेत दिइएको छ । साथै, यो व्यवस्था क्रमिक रुपमा जनप्रतिनिधि र अन्य कर्मचारीमा पनि लागु गरिने गाउँपालिकाको भनाइ छ ।