‘उच्च अदालत पाटनका सबै कोठा पारदर्शी’

उच्च अदालत पाटनमा हिजो दिउँसो भएको भनिएको छलफललाई लिएर प्रकाशित समाचारप्रति प्रतिक्रिया जनाउँदै अदालत प्रशासनले त्यसबेला कुनै ‘अन्यथा’ नभएको बताएको छ । चेक अनादरसम्बन्धी मुद्दाकी प्रतिवादी महिला र उनका कानुन व्यवसायीसहितको छलफललाई असन्तुष्ट पक्षले अतिरञ्जित रुपमा बाहिर लगेको उसको दावी छ ।

चार महिनाअघि १३ लाख रुपैयाँ धरौटीमा छुटेकी प्रतिवादी जुली नेपाली,अदालतको लेखा शाखाले दिएको रसिद र त्यसको आधिकारिकताको विषयमा कुनै अन्यथा छलफल नभएको पनि अदालत प्रशासनले बतायो । 

२ करोड रुपैयाँको चार वटा चेक अनादरवापत प्रहरी हिरासतमा पुगेकी जुलीले बुझाएको १३ लाख रुपैयाँ धरौटीको बारेमा कुनै छलफल नै नभएको अदालतको भनाइ छ । 
जुलीलाई साक्षी बकपत्र गराउने क्रममा हिजो अदालतमा भएको छलफललाई फरक ढंगले प्रचार गर्नेको नियतमाथि नै शंका गर्नुपर्ने उनीहरुको भनाइ छ । उच्च अदालतकी उपरजिष्ट्रार अमृताकुमारी शर्माले हिजै उक्त विषयमा सामान्य छलफल मात्रै भएको र सो कुरा तत्कालै सल्टिएको बताउनुभएको थियो । उहाँले ‘दावी गरिएजस्तो कुनै बबाल नभएको तर एउटा पुरानो इस्यु सेटल गर्न छलफल भएको’ प्रतिक्रिया दिनुभएको थियो ।

आज जनआस्थाले राखेको जिज्ञासामा रजिष्ट्रार ठगिन्द्र कट्टेलले भन्नुभयो,‘हामी पारदर्शी छौं । उच्च अदालत पाटनको चोटा कोठा सबै पारदर्शी छ । सेवाग्राहीको संवेदनशीलता र मर्काको समाधानप्रति अदालत प्रशासन दत्तचित्त र संवेदनशील छ । यही नै हाम्रो कर्तव्य र दायित्व हो ।’ आफूहरुले सर्वसाधारणको भलो चिताएर गरेका नियमित प्रशासनिक कार्यलाई अरुले उछाल्नु र उछाल्न खोज्नुलाई उहाँले ‘स्वार्थप्रेरित’ प्रयास भन्नुभएको छ ।