कलकत्ता डाइभर्ट भएको नेपाल वायुसेवाको विमान काठमाडौंमा अवतरण

आज बिहान त्रिभुवन अन्तर्राष्ट्रिय विमानस्थलमा अवतरण गर्न नसकेपछि भारतको कलकत्ता फर्केको नेपाल वायुसेवाको विमान केही बेरअघि काठमाडौं आइपुगेको छ । बिहान सवा ८ बजेको समयमा बाक्लो हुस्सुका कारण कम भिजिबिलिटीको कारण देखाउँदै उक्त विमान सिमरामाथिको आकाशबाट कलकत्ता गएको थियो ।

मलेशियाको राजधानी क्वालालम्पुरबाट आएको नेपाल वायुसेवा निगमको उडान नम्बर आरए ४१६ विमान बिहानै कलकत्ता फर्केको हो । कलकत्तामा केहीबेर रोकिएपछि काठमाडौंको आकाश खुल्नासाथ विमान यहाँ आएको बताइएको छ । उक्त विमान पौने २ बजे काठमाडौं विमानस्थलमा अवतरण गरेको हो ।

विमानमा १४७ जना यात्रु थिए । कलकत्ताबाट एक घण्टाको उडानपछि निगमको विमान काठमाडौंस्थित त्रिभुवन अन्तर्राष्ट्रिय विमानस्थलमा अवतरण गरेको हो । आज बिहान अन्य अन्तर्राष्ट्रिय उडानका विमान अवतरण भए पनि एअर इण्डिया र भिस्तारा एअरका विमान केहीबेर सिमरामाथिको आकाशमा होल्ड भएका थिए ।