शीतल निवासले पछाडिको कुर्सीमा राखेपछि अर्जुननरसिंह असन्तुष्ट

नेपाली काँग्रेसका सांसद अर्जुननरसिंह केसीले राष्ट्रपति कार्यालयले सांसदहरुप्रति राम्रो व्यवहार नगरेको भन्दै असन्तुष्टि जनाएका छन् । 

हिजो निर्वाचित सभामुख देवराज घिमिरेको आज आयोजित शपथ ग्रहण समारोहमा सांसदहरुलाई पछाडिका सीटमा व्यवस्थापन गरिएको भन्दै केसी असन्तुष्ट भएका हुन् । मर्यादाक्रमको १० औँ स्थानमा रहेका सांसदहरुलाई १३ औँ स्थानमा रहेका सचिवहरुभन्दा पछाडि राखिएकोमा आज फेसबुकमा लेखेर चित्त दुखाएका उनले राष्ट्रपति कार्यालयलाई मर्यादासम्बन्धी न्यूनतम व्यवस्था थाहा नभएको हो ? भनेर पनि सोधेका छन्  । 

‘सभामुख संसदको साझा संस्था हो । सम्मानका लागि राष्ट्रपति भवनको शपथग्रहणमा उपस्थित भएँ । राजपत्रको दशौं स्थानमा रहेका सांसदलाई तेह्रौं स्थानका सचिवभन्दा पछिल्तिर राखेर राष्ट्रपति भवनले अनौठो व्यवहार देखायो’, सांसद केसीले लेखेका छन्, ’के शितल निवासलाई मर्यादासम्बन्धी न्यूनतम काइदा कानुन थाहा नभएकै हो ?’