माओवादी उपमहासचिव जनार्दन शर्माद्वारा एमालेसङ्ग मिलेर जाने घोषणा

नेकपा माओवादी केन्द्रका उपमहासचिव तथा पूर्वअर्थमन्त्री जनार्दन शर्माले आगामी राष्ट्रपतिमा सत्ता गठबन्धनकै उम्मेदवार विजयी हुने धारणा व्यक्त गरेका छन् । शर्माले हिजोको संसद बैठकपछि सञ्चारकर्मीहरुसँग संक्षिप्त कुराकानी गर्दै सभामुख र उपसभामुखझैँ राष्ट्रपति पनि सत्ता गठबन्धनबाटै निर्वाचित हुने बताएका हुन् ।

शर्माको भनाइ छ, ‘माओवादी केन्द्र अब गठबन्धन फुटाउने र जोड्ने खेलमा लाग्दैन । माओवादी त्यसरी नलागेपछि  राष्ट्रपतिमा पनि सत्ता गठबन्धनकै उम्मेदवार निर्वाचित हुने निश्चित छ ।’

नेता शर्मा गत निर्वाचनको परिणामलगत्तै पूर्ववत काँग्रेस नेतृत्वको गठबन्धनलाई कायम राख्नुपर्ने धारणासहित सक्रिय भएका थिए । उनी माओवादी अध्यक्ष पुष्पकमल दाहाल प्रचण्ड नेतृत्वमा गठित वर्तमान सरकार बनाउन दिन नहुने भन्दै सक्रिय भएका समाचारहरु बाहिरिएका थिए । 

अघिल्लो सरकारमा अर्थमन्त्री रहेका शर्मा सर्वाधिक विवादमा मुछिएका पात्र हुन् ।