धरानका मेयर पनि बालेन बन्न खोजेपछि ..

काठमाडौँलगायत देशका ठूला स्थानीय सरकारमाथि निर्माणभन्दा ध्वंसलाई बढावा दिएको आरोप लागिरहेका बेला उत्कृष्ट काम गरेर चर्चामा रहेको धरान उपमहानगरपालिकासमेत विवादमा मुछिएको छ । शहरमा निर्मित भौतिक संरचनामाथि डोजर चलाउन थालिएपछि उपमहानगर विवादमा परेको हो । 

भौतिक संरचना भत्काउने अन्य स्थानीय तहका निर्णयको चर्को आलोचना गर्ने धरानका मेयर हर्क साम्पाहाङ राई त्यसलाई ध्वंसको संज्ञा दिने गर्थे । तर, आज बिहानै स्थानीयको घर भत्काउन उपमहानगरको डोजर धरान–५ स्थित देउराली पुग्यो । सार्वजनिक जग्गा र खोला अतिक्रमण गरी बनाइएको भनिएको मुना चौधरी लिम्बुको पक्की घर भत्काउन डोजर पुगेपछि त्यहाँ झडपसमेत भएको छ । 

डोजर चलाउने क्रममा सुरक्षाकर्मी र स्थानीय बासिन्दाबीच झडप हुँदा उपमहानगरको डोजरको सिसा फुटेको छ । विकासका नाममा नागरिकको घर भत्काउने कदमको प्रतिरोध गरेको एक स्थानीयले बताएका छन् । मेयर राईको भनाई र गराईमा आकाश जमिनको फरक परेको उनले गुनासो गरे । 

उपमहानगरले भने यसअघि नै १५ दिने सूचना निकालेर उक्त संरचना हटाउन भनेपनि अटेरी गरेकाले डोजर चलाउनु परेको भन्दै आफ्नो कदमको प्रतिरक्षा गरेको छ । उपमहानगरका एक अधिकृतले धरान–५ को खारखोला र अँधेरी खोलाको संगमस्थलमा बहुजातीय रंगशाला बनाउने निर्णय गरेको तर उक्त क्षेत्रमा एकतले पक्की घर निर्माण गरेकोले सुरक्षाकर्मी परिचालन गरी जग्गा खाली गराइएको जानकारी बताए । 

उनका अनुसार उपमहानगरले सार्वजनिक जग्गामा घर निर्माण नगर्न पटकपटक पत्राचार गरेपनि अटेरी गरेपछि बाध्य भएर डोजर चलाउनु परेको हो । उपमहानगरले खोला किनार र सार्वजनिक जग्गामा नयाँ घर निर्माण कार्यलाई निरुत्साहित गर्ने र पुराना निर्माण भएकालाई व्यवस्थित गर्ने नीति सञ्चालनमा ल्याएको उनको भनाइ छ ।