सशस्त्रको २२ औं दिवसमा अचम्मको संयोग,मार्ने मान्य फरार,मर्ने आज बल्ल सम्मानित

सशस्त्र प्रहरी बल नेपालले आज आफ्नो स्थापनाको २२ औं वार्षिकोत्सव मनाउँदै छ । बलको मुख्यालय स्वयम्भू,हलचोकमा अपरान्ह ४ बजे विशेष कार्यक्रमको आयोजना गरिँदैछ । कार्यक्रममा प्रमुख अतिथि प्रधानमन्त्री पुष्पकमल दाहाल प्रचण्ड र विशेष अतिथि गृहमन्त्री रवि लामिछानेलाई बनाइएको छ । 

प्रधानमन्त्री कार्यक्रमस्थलमा सवा ४ बजे पुग्ने तालिका छ । तर, स्थापनाको २२ वर्षमा आइपुग्दा सशस्त्र र माओवादी अध्यक्ष प्रचण्डबीच अचम्मको संयोग मिल्न गएको छ । २०५२ फागुन १ गतेबाट सशस्त्र आन्दोलन थालेको माओवादीका गतिविधिलाई नियन्त्रणमा लिन राज्यले सेना र नेपाल प्रहरीभन्दा फरक ढंगको सुरक्षा बल स्थापना गर्ने क्रममा सशस्त्रको जन्म भएको हो । माओवादी हिंसात्मक आन्दोलन शुरु भएको ७ वर्षपछि सशस्त्र प्रहरी बलको स्थापना भयो ।

त्यतिबेलाका माओवादी अध्यक्ष प्रचण्ड अहिले प्रधानमन्त्री र पार्टी अध्यक्ष हुनुहुन्छ । आज उहाँ र उहाँको तत्कालीन आन्दोलनलाई निस्तेज पार्न गठित संस्थाले मनाउन लागेको वार्षिक कार्यक्रमको प्रमुख अतिथि स्वयम दाहाललाई बनाइएको छ ।

त्यसैगरी आजैको कार्यक्रममा सशस्त्र प्रहरीका तत्कालीन असई स्वर्गीय थमन बिकलाई मरणोपरान्त सम्मान गरिँदैछ । उक्त सम्मान बिकको परिवारलाई हस्तान्तरण गर्ने कार्यक्रम छ । थमन बिक उनै हुन् जसलाई घाइते अवस्थामा एम्बुलेन्सबाट थुतेर मारेको अभियोगमा एमाले सांसद लक्ष्मी महतो कोइरीलाई अदालतले कैदको आदेश दिएको छ । संसदमा उपस्थित भएर शपथ लिएका, मतदानमा सहभागी भएका कोइरीलाई फरार भन्दै प्रहरीले हालसम्म पक्रेको छैन । प्रहरीले आफ्नो मौखिक निर्देशन नटेरेको भन्दै कोइरीलाई पक्रन गृहमन्त्री रवि लामिछानेले लिखित आदेश दिएको विज्ञप्ति मन्त्रालयले गत शुक्रबार प्रकाशित गरेको छ ।

कोइरी महोत्तरी १ बाट निर्वाचित सांसद हुन् ।  २०७२ भदौ २५ गते मधेश आन्दोलनको क्रममा आन्दोलनकारीको कुटाइबाट गम्भीर घाइते भएका बिकलाई उपचारार्थ जनकपुर लैजाने क्रममा एम्बुलेन्सबाट थुतेर हत्या गरिएको थियो  । उक्त घटनामा जिल्ला अदालत महोत्तरीले २०७६ असोज २ गते कोइरीलाई १ लाख रुपैयाँ धरौटीमा छाड्न आदेश दिएको थियो । 

तर जनकपुर उच्च अदालतले २०७७ मंसिर १९ गते जिल्लाको आदेश उल्ट्याउँदै कोइरीलाई थुनामै राखेर मुद्दा अघि बढाउन आदेश दिएपनि त्यसपछि उनी फरारको सूचीमा छन् । फरार भनिएकाले वारेशको तर्फबाट मनोनयन दर्ता गरेर चुनाव जिते । वारेशबाटै चुनावमा विजयी भएको प्रमाणपत्रसमेत बुझेका छन् ।

तर फरार रहेका भनिएका सांसदद्वारा हत्या गरिएका कोइरीको परिवारलाई प्रधानमन्त्री र गृहमन्त्रीको उपस्थितिमा सशस्त्र प्रहरीले आज सम्मान गर्नुलाई पनि अर्को संयोग ठानिएको छ ।