अबको अर्थमन्त्री मै हुँ भन्दै दिल्लीमा बिनोद चौधरीको भव्य भोज

नेपाली काँग्रेसका सांसद तथा डलर अर्बपति विनोद चौधरीले नयाँ दिल्लीमा भव्य भोजको आयोजना गरेका छन् । उनले केही दिनअघि भोज गरेर त्यहाँका उच्चपदस्थ सरकारी अधिकारी र व्यापारी समूहलाई निम्तो दिएका थिए । आमनिर्वाचनमा अत्यधिक बहुमतसहित विजयी भएको खुशीयाली र भावी अर्थमन्त्रीको प्रोजेक्सनस्वरुप उनले दिल्लीमा आयोजना गरेको भोजमा थुप्रै गन्यमान्य पाहुनालाई निम्ताएका थिए ।

गत आमनिर्वाचनमा नवलपरासीको निर्वाचन क्षेत्र नम्बर १ बाट विजयी भएपछि उनले नयाँ सरकार गठन हुनुअघि नयाँ दिल्ली पुगेर भोज आयोजना गरेका हुन् । सँधै हवाई उडानबाट जाने गरेका उनी त्यसपटक भने स्थलमार्ग हुँदै नयाँ दिल्ली गएको स्रोतको दाबी छ ।

"भोज दिल्लीको इन्टिमो, डिएलएफ क्यामेलिआजमा डिसेम्बर ७ अर्थात गत मंसिर २१ गते साँझ ८ बजेपछि आयोजन गरिएको थियो ।"

छोरा बरुण र बुहारी अनुश्रीको तर्फबाट पठाइएको निम्तो कार्डमा चौधरीले चुनाव जितेको खुशीयालीमा भोज गरेको उल्लेख छ । एउटा व्यवसायीले प्रत्यक्ष आमनिर्वाचनमा विजयी भएर प्राप्त गरेको उक्त उपलब्धीलाई छोरा बरुणले ‘कोशेढुंगा’ भनेका छन् । त्यही खुशी बाँड्न आयोजन गरिएको भोजमा सहभागी हुन बाँडिएको कार्ड अंग्रेजीमा लेखिएको छ । भोज दिल्लीको इन्टिमो, डिएलएफ क्यामेलिआजमा डिसेम्बर ७ अर्थात गत मंसिर २१ गते साँझ ८ बजेपछि आयोजन गरिएको थियो ।

आफूलाई तत्कालीन प्रधानमन्त्री शेरबहादुर देउवाको विशेष प्रतिनिधि भन्दै त्यतिबेला दिल्ली पुगेका उनीबारे भारतीयहरुले लैनचौरमार्फत सोधनी गर्दा वास्तविकता खुलेको हो । भारतीयहरुले चौधरीको विशेष प्रतिनिधि भन्ने दाबीलाई बालुवाटारको किचेन क्याबिनेटमा सोधपुछ गरेपछि अर्कै अर्थ लगाएका हुन् ।

सोही सत्यतापछि उनको ‘भव्य’ भोजमा भारत सरकार र भारतीय जनता पार्टीको तर्फबाट विदेश मामिला प्रमुख विजय चौथाइवाले मात्रै सहभागी भएको बताइएको छ । उनले आफूलाई काँग्रेस सभापति शेरबहादुर देउवाको नेतृत्वमा गठन हुने नयाँ सरकारमा अर्थमन्त्री ‘कन्फर्म’ भन्दै कतिपय भारतीयलाई आश्वस्त तुल्याएका थिए ।

उनले भावी अर्थमन्त्रीको रुपमा सम्पर्क कार्यालय समेत व्यवस्था गरिसकेको चौधरी ग्रुप निकटस्थहरुको भनाइ छ । कार्यालयमा एक जना भण्डारी थरका सञ्चारकर्मीलाई नियुक्त गरेका थिए । 

गत पुस पहिलो साता सम्पन्न काँग्रेस संसदीय दलको चुनावको अघिल्लो रात उनले बालुवाटारमा तत्कालीन प्रधानमन्त्री देउवा, गृहमन्त्री खाँण र उपसभापति पूर्णबहादुर खड्कासँग झण्डै दुई घण्टा कुराकानी गरेका थिए । भोलिपल्टको निर्वाचनलाई लक्षित गर्दै चौधरी आवश्यक थैली व्यवस्थापनको वचन दिएर राति १० बजे रविभवनस्थित निवास फर्केको र भोलिपल्ट शेखर-गगन खेमाका ८ जना साँसद चोरी भएको उतिखेरै चर्चा थियो ।