नागरिकता बनाउन निवेदन बोकेर प्रशासन कार्यालय पुगे रवि

राष्ट्रिय स्वतन्त्र पार्टी (रास्वपा) का निवर्तमान सभापति रवि लामिछाने नागरिकता बनाउन जिल्ला प्रशासन कार्यालय काठमाडौं पुगेका छन् । सर्वोच्च अदालतले उनको नागरिकतामा कैफियत ठहर गरेपछि पुनप्र्राप्तिको निवेदन लिएर उनी केहीबेरअघि प्रशासन कार्यालय पुगेका हुन् । 

सर्वोच्चको फैसलापछि गृहमन्त्री र पार्टीको सभापति पद गुमाएका लामिछाने प्रशासन कार्यालयमा पुग्दा उनका समर्थकहरुको घुइँचो लागेको छ । भीड बढेपछि त्यहाँ ठूलो संख्यामा सुरक्षाकर्मी तैनाथ गरिएको छ । 

अमेरिकी नागरिकता त्यागेपछि नेपालको नागरिकता पुनः प्राप्तिको प्रक्रिया पूरा नगरी पुरानै नागरिकता प्रयोग गरेको सर्वोच्च अदालतको फैसलापछि लामिछानेले एकैचोटी चार वटा महत्वपूर्ण पद गुमाएका छन् । अदालतको फैसलाले उनको सांसद, उपप्रधानमन्त्री, गृहमन्त्री र पार्टीको सभापति पद गुमेको हो । 

लामिछानेले २०५० फागुन १० गते जिल्ला प्रशासन कार्यालय काठमाडौंबाट नेपाली नागरिकता प्राप्त गरेका थिए । सन् २०१४ मा अमरिकी नागरिकता (ग्रिन कार्ड) लिएका उनले २०१८ मा त्यागेका थिए । तर, उता नागरिकता त्यागेको निस्सा प्रशासन कार्यालयलाई दिएर यताको नागरिकता जागृत गराउनुपर्नेमा उनले पुरानै नागरिकता अभ्यासमा ल्याएपछि त्यसविरुद्ध अदालतमा मुद्दा परेको हो ।