रविले फेरि मागे गृह मन्त्रालय

नागरिकतासम्बन्धी मुध्दामा सर्वोच्च अदालतको फैसलाले पद गुमाएका रवि लामिछानेलाई पुरानै जिम्मेवारीमा फर्काउने तयारीका साथ राष्ट्रिय स्वतन्त्र पार्टी (रास्वपा) ले गृह मन्त्रालय आफूले पाउनुपर्ने अडान लिएको छ । गैरसंसद भैसकेका लामिछानेलाई ६ महिने मन्त्री बनाउन सो पार्टीले यस्तो अडान लिने भएको हो । 

आज बसेको पार्टी केन्द्रीय समिति बैठकले पुन: गृह मन्त्रालय पाउनुपर्ने र त्यसका लागि सत्ता साझेदार दलहरुसँग छलफल अघि बढाउने निर्णय गरेको छ । लामिछानेलाई गृहमन्त्रीकै रूपमा पठाउने तयारी भैरहेको एक नेताले बताए । उनका अनुसार गैरसांसद पनि ६ महिनाका लागि मन्त्री बन्न पाउने कानुनी व्यवस्था रहेको र उपचुनावमार्फत लामिछाने पुन: जितेर आउने सम्भावना भएकाले त्यस्तो तयारी गरिएको हो । 

गृह मन्त्रालय नपाए आफूहरू सरकारबाट बाहिरिने उनको चेतावनी छ । आजैको बैठकले लामिछानेलाई सभापतिमा पुनर्बहाली गरेको छ । जिल्ला प्रशासन कार्यालय काठमाडौँबाट नागरिकता पाएलगत्तै उनलाई पुरानै जिम्मेवारीमा फर्काईएको हो ।