स्ववियु चुनाव पूर्ण समानुपातिक बनाउन उपेन्द्रका विद्यार्थीको माग

जनता समाजवादी पार्टी (जसपा) निकट समाजवादी विद्यार्थी युनियनले स्ववियु निर्वाचन पूर्णसमानुपातिक निर्वाचन प्रणालीमार्फत गराउन माग गरेको छ । प्रधानमन्त्री पुष्पकमल दाहाल प्रचण्डलाई ज्ञापनपत्र बुझाउँदै युनियनले यस्तो माग अघि सारेको हो ।   

स्ववियु निर्वाचनलाई सही अर्थमा सफल बनाउन निर्वाचन प्रणालीलाई पूर्ण समानुपातिक बनाउनुपर्ने उनीहरुको जोड छ । त्यस्तै,एक दशकपछि हुन लागेको स्ववियु निर्वाचनले संविधानका प्रावधानहरुलाई पूर्णरुपमा लागू गराउने विद्यार्थी युनियनको अपेक्षा छ । 

‘हाम्रो संगठन र त्रिविबीच भएको सहमतिअनुसार पूर्ण समानुपातिक निर्वाचन प्रणालीमार्फत तोकिएकै मितिमा निर्वाचन गराउनका लागि त्रिवि कुलपतिसमेत रहेका प्रधानमन्त्रीसमक्ष ध्यानाकर्षणसहित जोडदार माग गर्दछौँ,’पत्रमा भनिएको छ । 

साथै,स्ववियु एक संस्था मात्र नभएर आम विद्यार्थीहरुको हकहित तथा अधिकार स्थापित गर्ने साझा मञ्च रहेकाले चुनाव गराउन त्रिविले देखाएको सक्रियतालाई जसपाका विद्यार्थीहरुले सकारात्मक भनेका छन् । त्रिविले आगामी चैत्र ५ गतेका लागि स्ववियु निर्वाचनको मिति तोकेको छ ।