रवि नागरिकता लिन जाँदा सिडिओको कोठा भताभुङ्ग

शुक्रवार सर्वोच्चको आदेशपछि रवि लामिछाने हिजो प्रक्रिया पुर्याएर नागरिकता लिन काठमाडौंका प्रमुख जिल्ला अधिकारीको कार्यालय पुगेका छन् । यसबाट अमेरिकी नागरिकता लिएपछि स्वतः निष्क्रिय भएको नेपाली नागरिकता बोकेर हिँडेका उनले पछिल्लो सात वर्ष सोही नागरिकताको दुरुपयोग गरेको प्रमाणित भैसकेको छ । 

उनलाई प्रक्रिया पुर्याएर नागरिकता लिन अदालतले आदेश दिएपछि अस्ति शनिवार  वडा कार्यालयबाट सिफारिस लिएको र भैपरीमा साक्षी राख्न हिजो दाजु हरिशरणलाई सङ्गै लगेको देखिएको  छ । 

बिहान साढे १० बजे बबरमहलस्थित सिडिओ कार्यालय जाने कार्यक्रम राखे पनि उनी मध्यान्ह १२ बजेतिर त्यहाँ पुगेका थिए । लामिछाने काठमाडौं सिडिओ कार्यालयमा पुग्दा समर्थकभन्दा युट्युबरहरुको भीड बाक्लो थियो ।

त्यो लाइन सिडिओ कार्यालयको थिएन र लामिछाने लाइनमा पनि बसेका थिएनन् । जाडो महिनामा हाफ सर्ट लगाएर कोही हिंड्दैन र रवि आजसम्म कहिँ लाइन लागेको देखिएको पनि छैन ।

तर कार्यालयको पहिलो तल्लाको भित्री भाग भत्काइएकाले कोठाहरु सबै भताभुङ्ग देखिन्थे । पूरै तल्ला असरल्ल र भद्रगोल भएकाले सिडिओ घनश्याम उपाध्याय भने त्यतिबेला सहायक सिडिओको कोठामा बसेका थिए । 

‘लामिछाने सुईंसुईं सिडिओ बसेकै कोठामा पुगे । दुई जना पातलो शरीरका मान्छे पनि उनीसँगै थिए,’ त्यहाँका एक जना कर्मचारीले भने । तर बाहिर युट्युबेहरुको भीड थामिनसक्नु थियो । अधिकांशको हातमा क्यामरा थिए । सबै टेलिभिजनका क्यामरा म्यान झैँ देखिएको उनै कर्मचारीले बताए । 

सिडिओ कार्यालयमा पुगेपछि लामिछाने पहिले जस्तो उग्र नदेखिएको बताइन्छ ।  ‘भित्र पनि खासै बोलेनन् । नागरिकताको निम्ति आएको हुँ भन्दै सिडिओसँग केही समय कुरा गरे । नागरिकता लिएर निस्कँदा पनि बाहिरका मिडियाकर्मी तथा युट्युबेहरुसँग खासै बोलेनन्,’ सिडिओ कार्यालयका एक जना अधिकृतले त्यहाँको परिदृश्य उल्लेख गर्दै भने ।

तर, सुरक्षाकर्मीहरु भने बिहान साढे ९ बजेदेखि नै सिडिओ कार्यालय वरपर बाक्लो संख्यामा परिचालन भइसकेका थिए । रविका समर्थकहरुले अनावश्यक प्रचार गर्न फोटो सपबाट फोटो सम्पादन गरेर रवि लामिछाने सिडिओ कार्यालयमा लाइनमा बसेको देखाएका थिए ।