संगठनबारे सल्लाह गर्न समाजवादीका नेताहरु छलफलमा

अर्को साता बस्न लागेको केन्द्रीय समिति बैठकका एजेण्डा तय गर्न नेकपा एकीकृत समाजवादीका शीर्ष नेताहरुले अनौपचारिक छलफल गरेका छन् । पार्टी मुख्यालय आलोकनगरमा अध्यक्ष माधवकुमार नेपालसहितका नेताहरु छलफलमा बसेका हुन् । 

समाजवादीले आउँदो माघ २१ र २२ गते केन्द्रीय कमिटी बैठक बोलाएको छ । त्यसअघि बैठकका एजेण्डाबारे नेताहरु छलफलमा बसेको एक नेताले बताए । छलफलमा पार्टी तथा जनसंगठनका कमिटीहरु अद्यावधिक गर्ने, सदस्यता नवीकरण तथा वितरण र पार्टी कमिटी गठन हुन बाँकी रहेका पालिका तथा विशेष इलाकाहरुमा तत्काल कमिटी बनाउनेलगायतका विषयलाई केन्द्रीय समिति बैठकको एजेण्डा बनाउनेबारे नेताहरुबीच कुराकानी भएको बताइएको छ । 

बैठकमा उपाध्यक्ष प्रमेश हमाल, महासचिव वेदुराम भुसाल, उपमहासचिव प्रकाश ज्वाला, विजय पौडेल सहभागी थिए । त्यस्तै, हालै समाजवादीमा प्रवेश गरेका पूर्वमन्त्री घनश्याम भुसाल पनि सो छलफलमा बसेका थिए ।