महासचिवको गृहजिल्लामा अखिलका तीन जना नेतामाथि कारवाही

नेकपा एमाले दाङले पार्टी हितविपरीत काम गरेको भन्दै भातृ संगठन अनेरास्ववियुका जिल्ला इञ्चार्ज वीरवल खड्कासहित अन्य दुईजना सह–इन्चार्जलाई कारबाहीको सिफारिस गरेको छ । 

अध्यक्ष हुकुमबहादुर बस्नेत र सचिव मनोहर बुढाथोकीले अनेरास्ववियुका केन्द्रीय अध्यक्ष र महासचिवलाई पत्र लेख्दै इन्चार्ज खड्का,सह–इन्चार्ज प्रकाश शर्मा र गोपाल रेग्मीलाई कारबाहीको सिफारिस गरेका हुन् । 

कारवाहीका लागि सिफारिस गरिएका तीनै जनामाथि समानान्तर गतिविधि गरेको आरोप लगाइएको छ । यही ११ माघमा सम्पन्न अनेरास्ववियु दाङको २३ औँ सम्मेलनमा सहभागी नभई उनीहरुले समानान्तर कमिटी गठन गरी पार्टी विधानको धज्जी उडाउने काम गरेको एमाले दाङको दावी छ । 

उनीहरुलाई पार्टी विधान २०४९ को अध्याय आठको धारा ८० अनुसार अनुशासन उल्लंघन गरेकाले सोही अध्यायको ८१ अनुसार जिल्ला कमिटीको तर्फबाट लिखित स्पष्टीकरणसमेत माग गरिएको छ ।