देवप्रकाश त्रिपाठीले भेटेपछि ‘र’ प्रमुख पूर्व राजदूतको निवासमा

भारतीय खुफिया एजेन्सी ‘र’ का काठमाडौं प्रमुख राघवप्रसाद भट्नागरसँग हिजो अर्का पत्रकारले पनि ‘मुलाकात’ गरेका छन् । प्रायः ऋषि धमलासँग भेटघाट गर्ने भट्नागरले हिजो घटना र विचारका वरिष्ठ पत्रकार देवप्रकाश त्रिपाठीसँग बातचित गरेका हुन् । 

कुराकानीको निम्ति त्रिपाठी भट्नागरको निवास पुगेका थिए । उनको निवास विशालनगरमा भएको त्रिपाठीसँगको छलफल बिहान पौने १० बजेदेखि झण्डै साढे ११ बजेसम्म चलेको थियो ।

त्रिपाठीसँगको भेटपछि राघव पनि सँगसँगैजसो निस्किएको बताइन्छ । उनी ललितपुर मानभवनस्थित कर्ण निवास पुगेका थिए । डेनमार्कका निम्ति माओवादी कोटाबाट पूर्वराजदूत विजयकान्त लाल कर्णसँग कुरा गर्न भट्नागर त्यहाँ पुगेको सूचना अमरेशकुमार सिंहले सार्वजनिक गरेका हुन् । उनीहरुवीच मध्यान्ह सवा १२ बजेदेखि झण्डै १ बजेसम्म भेटवार्ता भएको बुझिएको छ ।

तर, वरिष्ठ पत्रकार त्रिपाठीले आफूले हिजो कसैसँग नभेटेको बताएका छन् । ‘र’ प्रमुखसँग देखभेट नै नभएको उनको भनाइ छ ।