नागरिक उन्मुक्तिका सांसदहरु अनुपस्थित्, मुख्यमन्त्री रावलको पद धरापमा

मुख्यमन्त्री राजेन्द्र सिंह रावलले विश्वासको मत लिने प्रयोजनका लागि आह्वान गरिएको सुदूरपश्चिम प्रदेशसभाको बैठक नागरिक उन्मुक्ति पार्टीले बहिष्कार गरेको छ । 

अहिले जारी बैठकमा उन्मुक्तिका सांसद अनुपस्थित देखिन्छन् । उन्मुक्तिले मुख्यमन्त्री रावललाई विश्वासको मत नदिने निर्णय गरेको छ ।

उक्त पार्टीले साथ नदिँदा मुख्यमन्त्री रावलले विश्वासको मत पाउन कठिन छ । प्रदेशसभामा एमाले १०, माओवादी केन्द्र (सभामुख बाहेक) १० र राप्रपा १ गरी सत्ता गठबन्धनसँग केवल २१ मत छ । जुन आवश्यक मत २७ भन्दा ६ भोट कम हो । ७ मत रहेको नागरिक उन्मुक्ति पार्टी निर्णायक देखिन्छ ।

पुस २७ गते मुख्यमन्त्री नियुक्त भएका रावलले माओवादी केन्द्र, एमाले, नागरिक उन्मुक्ति र राप्रपाको समर्थन पाएका थिए । त्यतिबेला उनलाई २९ सांसदको समर्थन थियो ।

संविधानअनुसार मुख्यमन्त्री नियुक्त भएको एक महिनाभित्र विश्वासको मत लिनुपर्ने हुन्छ । मुख्यमन्त्री रावलले आज विश्वासको मत प्राप्त गर्न नसके संविधानको अर्को धारा अनुसार प्रदेशसभाको सबैभन्दा ठूलो दलको संसदीय दलका नेतालाई प्रदेश प्रमुखले मुख्यमन्त्री नियुक्त गर्नुपर्ने हुन्छ ।