रविन्द्र मिश्रले 'मार्ग परिवर्तन' गरेपछि खुम्चिएको विवेकशील पुनर्संगठित हुँदै

वैकल्पिक राजनीति त्यागेर रवीन्द्र मिश्रले 'मार्ग परिवर्तन' गरेपछि कमजोर भएको विवेकशील साझा पार्टी महाधिवेशनमा होमिएको छ । काठमाडौँको कमलादीस्थित नेपाल प्रज्ञा प्रतिष्ठानमा सो पार्टीको प्रथम महाधिवेशन आजबाट शुरु भएको हो । 

महाधिवेशनको उद्धघाटन सत्रमा बिभिन्न पार्टीका नेताहरुले सम्बोधन गर्ने कार्यक्रम छ । नेपाल समाजवादी पार्टीका अध्यक्ष डा. बाबुराम भट्टराई, जनमत पार्टीका अध्यक्ष सिके राउत, नेकपा एकीकृत समाजवादीका घनश्याम भुषाललगायत महाधिवेशनस्थलमा पुगेका छन् ।

संस्थापक अध्यक्ष मिश्रले मार्ग परिवर्तनका नाममा गणतन्त्र, संघीयता र धर्मनिरपेक्षताजस्ता संविधानका आधारभूत विषयमा विमति जनाएपछि विवेकशीलमा विवादको विजारोपण भएको थियो । जसका कारण छिन्नभिन्न भएको सो पार्टीले गत निर्वाचनमा निराशाजनक परिणाम ल्याएको थियो । 

यस्तो अवस्थामा पार्टीलाई पुनर्संगठित गर्न महाधिवेशन आयोजना गरेको सो पार्टीका नेताहरुले बताएका छन् । नेता केशव दाहालको नेतृत्वमा पाँच सदस्यीय निर्वाचन समिति गठन गरेकाे विवेकशीलले महाधिवेशनबाट नयाँ नेतृत्व पनि चयन गर्नेछ । हालका अध्यक्ष समीक्षा बाँस्कोटा, नेताहरु प्रकाशचन्द परियार र मिलन पाण्डे अध्यक्षका लागि आकांक्षी छन् । 

महाधिवेसनमा दाहालले राजनीतिक दस्तावेज पेश गर्नेछन् भने प्रस्तावित विधान भने रमेश पौडेल पेस गर्ने मिलन पाण्डेले जानकारी दिए । उनका अनुसार महाधिवेशनपछि विवेकशील बहुपदीय प्रणालीमा जानेछ । जसअनुसार अध्यक्ष, उपाध्यक्ष, महासचिव, सचिव, काेषाध्यक्षलगायत बहुपदीय संरचना निर्माण हुनेछ ।

महाधिवेशनमा देशभरबाट करिब एक हजार जना प्रतिनिधि सहभागी छन् ।