रवि लामिछानेको ठाउँमा बैशाख १० गते फेरि चुनाव

राष्ट्रिय स्वतन्त्र पार्टी (रास्वपा) का सभापति रवि लामिछानेको सांसद पद खारेज भएपछि रिक्त चितवन क्षेत्र नम्बर २ मा आगामी वैशाख १० गते उपनिर्वाचन हुने भएको छ । आज बसेको निर्वाचन आयोगको बैठकले वैशाख १० गतेका लागि उपनिर्वाचनको मिति घोषणा गरेको हो । आयोगले आज सार्वजनिक गरेको विज्ञप्तिमा प्रतिनिधिसभा सदस्य निर्वाचन ऐन,२०७४ को दफा ६८ बमोजिम उपनिर्वाचनको मिति तोक्ने निर्णय भएको उल्लेख छ । 

यसअघि रास्वपाले तत्काल उपनिर्वाचनको मिति तोक्न सरकारलाई दबाब दिँदै आएको थियो । आज बिहान बसेको सत्ता गठबन्धनको उच्चस्तरीय राजनीतिक संयन्त्रको बैठकमा पनि तत्काल उपचुनाव गर्नेबारे लामिछानेले प्रधानमन्त्रीको ध्यानाकर्षण गराएपछि त्यसबारे छलफल भएको थियो । 

गत मंसिरमा भएको निर्वाचनमा लामिछाने भारी मतले चितवन-२ बाट निर्वाचित भएका थिए । तर, सर्वोच्च अदालतको संवैधानिक इजलासले उनको नागरिकता अवैध ठहर गरेपछि सांसद पद खारेज भएको हो । त्यसपछि उपप्रधानसहित गृहमन्त्री पद गुमाएका लामिछाने तत्काल उपनिर्वाचनमार्फत चुनिएर आउन चाहन्छन् । तर,संसद्को चौथो शक्ति रास्वपाको निर्णयले राष्ट्रपतिको चुनाव प्रभावित हुनसक्ने अवस्थालाई समेत ध्यानमा राखेर बैशाखमा चुनावको मिति तय भएको बताइन्छ ।

बैशाखसम्ममा लामिछानेमाथि लागेको दोहोरो राहदानीको आरोप किनारा लागिसक्ने र राष्ट्रपति, उपराष्ट्रपतिको चुनावपछि थप क्षेत्र रिक्त भए ती ठाउँमा पनि एकैचोटी चुनाव गराउन सजिलो हुने भएकाले बैशाख पुर्याइएको जानकार स्रोतले बताएको छ ।