उपप्रधानमन्त्री गोरखाबाट फर्कनुभयो, पूर्वप्रधानमन्त्री पोखरा पुग्नुभयो

पूर्वप्रधानमन्त्री तथा नेकपा एकीकृत समाजवादीका अध्यक्ष माधवकुमार नेपाल आज पोखरा पुग्नुभएको छ । उहाँ श्री एयरलाइन्सको विमानमा दिउँसो साढे २ बजे त्यता प्रस्थान गर्नुभएको हो । 

अध्यक्ष नेपाल अस्ति धनगढी गएर हिजो साँझ राजधानी फर्कनुभएको हो । उहाँ हिजो धनगढीबाट प्रधानमन्त्री सवार सेनाको विमानमा सँगै काठमाडौं आएपछि आज पोखरा जानुभएको बताइएको छ ।

उता, उपप्रधान एवम् भौतिक पूर्वाधार तथा यातायातमन्त्री नारायणकाजी श्रेष्ठ आज हेलिकोप्टरमा गोरखा पुगेर फर्कनुभएको छ । मन्त्री श्रेष्ठसहित पाँच जना एअर डाइनाष्टिको होलिकोप्टरमा गोरखा जानुभएको हो । उहाँ साँझ ५ बजे राजधानी आउनुभएको बताइएको छ ।

उहाँहरु दुबै जनाले आज बिहान नेपाल भ्रमणमा रहेका भारतीय विदेश सचिव विनयमोहन क्वात्रासँग शिष्टाचार भेटवार्ता गर्नुभएको थियो । अध्यक्ष नेपालले आफ्नै निवास कोटेश्वरमा र मन्त्री श्रेष्ठले सिंहदरबारस्थित मन्त्रालयमा भेट गर्नुभएको हो ।