कमल थापाले बाँडे त्रिभुवन जयन्तीको निम्तो

कमल थापा नेतृत्वको राप्रपा नेपालले पर्सि त्रिभुवन जयन्ती मनाउने भएको छ । राजसंस्था छाडेर गणतन्त्र स्वीकार गरी एमालेको सूर्य चिन्हमा चुनाव लडेको सो पार्टीले आफ्नो स्थापना दिवसको अवसर पारेर त्रिभुवन जयन्ती मनाउन लागेको बताइएको छ । 

फागुन ७ गते दिउँसो साढे १२ बजे प्रज्ञा प्रतिष्ठानको हलमा हुने उक्त कार्यक्रमका लागि अध्यक्ष थापाले निम्तो बाँडिसकेका छन् । शाहवंशीय राजाको जन्मजयन्ती मनाउन लागेको राप्रपाले राजसंस्था फर्काउने मुद्दा भने औपचारिक रुपमा छाडिसकेको छ ।

२०६२/०६३ को परिवर्तनपछि राजतन्त्रको पक्षमा एक्लो उभिएका थापाले राप्रपाको पछिल्लो महाधिवेशनमा पूर्वराजा ज्ञानेन्द्र शाहले हस्तक्षेप गरेर आफूलाई हराएको आरोप लगाउँदै राप्रपा छाडेर नयाँ पार्टी गठन गरेका हुन् । उक्त पार्टीले राजसंस्थाको मुद्दा भने बोकेको छैन । 

अध्यक्ष थापाले सार्वजनिक मञ्चबाटै आफूलाई राजसंस्थाप्रति मोहभङ्ग भइसकेको बताउने गरेका छन् ।