अध्यक्ष नेपाल जनकपुर प्रस्थान, सम्मानित नेता काठमाडौं आगमन

भूतपूर्व प्रधानमन्त्रीद्वय तथा नेकपा एकीकृत समाजवादीका अध्यक्ष र सम्मानित नेतामध्ये एक जना हिजो राजधानीबाट बाहिरिनुभएको छ । अर्का एक जना विदेशबाट स्वदेश आउनुभएको छ ।

अध्यक्ष माधवकुमार नेपाल हिजो साँझ जनकपुर जानुभएको हो । उहाँ बुद्ध एअरको उडानमा साँझ सवा ६ बजे त्यसतर्फ प्रस्थान गर्नुभएको बताइन्छ । उहाँसँगै पूर्वमन्त्री तथा एकीकृत समाजवादीका नेता कृष्णकुमार श्रेष्ठ किसान पनि जनकपुर जानुभएको हो ।

सम्मानित नेता झलनाथ खनाल हिजो साँझ ढाकाबाट काठमाडौं आउनुभएको छ । उहाँ हिमालय एअरलाइन्सको उडानमा आउनुभएको हो । नेता खनाल ढाकामा आयोजित मानवअधिकार सम्बन्धि सम्मेलनलाई सम्बोधन गर्न त्यता जानुभएको थियो ।
 
उपप्रधान तथा अर्थमन्त्री विष्णु पौडेल भारतको बैंगलोरबाट स्वदेश फर्कनुभएको छ । उहाँ बैंगलोरमा आयोजित जी २० समूहको अर्थमन्त्रीहरुको सम्मेलनमा भाग लिन जानुभएको थियो । सम्मेलनमा भारतले छिमेकी मुलकका अर्थमन्त्रीहरुलाई आमन्त्रण गरेको हो ।

मन्त्री पौडेल नेपाल वायुसेवा निगमको उडान नम्बर आरए २२६ मा आउनुभएको हो । उहाँसँगै अर्थमन्त्रालयका सहसचिव रमेश नेपाल राति ९ बजे आइपुग्नुभएको बताइन्छ ।