प्रधानमन्त्री प्रचण्ड विरुद्धको मुद्दा विश्वम्भर श्रीमानको इजलासमा

प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डविरुद्ध सर्वोच्च अदालतमा अस्ति दर्ता भएको मुद्दाको पेसी न्यायाधीश विश्वम्भरप्रसाद श्रेष्ठको इजलासमा तोकिएको छ ।

माओवादी द्वन्द्वपीडितका तर्फबाट अधिवक्ता ज्ञानेन्द्र आरण र कल्याण बुढाथोकीले अस्ति मंगलबार दुई वटा रिट दर्ता गराएका थिए । सर्वोच्चले सोही दिन प्रधानमन्त्री दाहाललाई आज बिहान १० बजे अदालतमा उपस्थित हुन भनेको थियो । सोही मुद्दा आज इजलास नम्बर १ मा परेको छ । मुद्दाको क्रमसंख्या चौथो नम्बरमा छ ।

प्रचण्डले पाँच वर्षअघि काठमाडौंको टुँडिखेलमा आयोजित कार्यक्रममा माओवादी द्वन्द्वकालमा मारिएका १७ हजार नागरिकमध्ये पाँच हजारको जिम्मा आफूले लिने बताएका थिए । उनको उक्त धारणालाई आधार बनाएर प्रचलित कानुनबमोजिम पक्राउ गरेर सजाय तोक्न माग गर्दै आरण र बुढाथोकीले रिट दर्ता गरेका हुन् ।