विप्लवद्वारा लघुवित्तको किस्ता संकलनमा रोक, कर्मचारीलाई कालोमोसो दलेर जुत्ताको माला लगाउने धम्की

विप्लव समूहको माओवादीले झापामा लघुवित्त संस्थाको किस्ता बुझाउने कार्यमा रोक लगाएको छ । झण्डै एक दर्जनको संख्यामा रहेको समूहले मध्यान्ह साढे १२ बजेको समयमा लघुवित्तका कर्मचारीलाई जबर्जसती किस्ता उठाउन नदिइएको बताइएको छ ।

झापा गाउँपालिका–३ स्थित फूलबारीमा नेकपा ‘विप्लव’ को झापा गाउँ कमिटीले उक्त रोक लगाएको हो । पालिका इञ्चार्ज कुमार मैनालीको नेतृत्वमा  लघुवित्तको किस्ता उठाउन पुगेका सहारा लघुवित्तका प्रतिनिधिलाई उक्त कार्य नगर्न चेतावनी दिएका हुन् ।

उनीहरुले कर्मचारीलाई जनता र नेकपा कम्युनिस्ट पार्टिले किस्ता तिर्ने कार्य बहिष्कार गरेको जानकारी गराउँदै भने, ‘पैसा उठाउन दिईंदैन । जनताले लुघवित्तलाई कालोसूचीमा राखेका छन् । फेरि यहि कामको लागि आएमा राम्रो हुने छैन । विप्लव समूह कालोमोसो दल्न र जुत्ताको माला लगाइदिएर गाउँबाट भगाउन बाध्य हुनेछ ।’