कोशी विरोधीहरुको आन्दोलन उग्र हुने, कागजातमा लेखिएको कोशी मेट्न आग्रह

प्रदेशको नाम कोशी नामकरण गरिएकोमा आन्दोलनरत पक्षले विरोध कार्यक्रमलाई आगामी दिनमा थप चर्काउने भएको छ । उनीहरुले पहिचानसहितको नाम राख्नुपर्ने माग गर्दै आएका छन् ।

प्रदेश नम्बर १ को पूनः नामाङ्कन संयुक्त सर्घष समितिले आन्दोलनका नयाँ कार्यक्रमहरु सार्वजनिक गरेको छ । जसअनुसार आगामी दुई साता गाउँ÷सहर जागरण मार्च अभियान भनिएको छ । भोलि ताप्लेजुङ, पर्सि पाँचथर, १३ गते झापा र त्यसपछि सुनसरीमा अभियानको कार्यक्रम राखिएको छ ।

१४ वटै जिल्लामा सभा र क्षेत्रीय सभाहरु राखिएको छ । काठमाडौँमा मोटरसाइकल जुलुससहित सभा गर्ने बताइएको छ । उनीहरुले राजनीतिक दल, थातथलो खुलेका र नखुलेका आदिवासी जनजातिलगायत समुदाय र प्रदेश १ का जनतासँग समन्वय र छलफल गर्ने कार्यक्रम राखिएको छ ।

आन्दोलनकारीले प्रदेश नम्बर १ का सरकारी निकाय, व्यवसायी (होटल, रेस्टुरेन्ट, विद्यालय, क्याम्पस, सवारी साधन), गैरसरकारी संस्था सबैले लेटरप्याड, बोर्डमा कोशी प्रदेश नलेख्न र लेखिएको भए मेट्न अनुरोधपत्र वा विज्ञप्ति पठाउने भनिएको छ ।  

उनीहरुले पूर्व घोषित कार्यक्रमहरुको निरन्तरता दिने जनाएका छन् । पूर्व घोषित कार्यक्रममा तालाबन्दी र कालो झण्डा गाड्ने, कोशी बोर्ड नलेख्ने र लेखिएका लेटरप्याडको प्रयोगमा प्रतिबन्ध लगाइने छ ।

कोशी प्रस्तावमा मत हालेका ८२ प्रदेश सांसदलाई बहिष्कार गर्ने, प्रदेशको नाम कोशी खारेजी सम्बन्धी साहित्यिक र सांस्कृतिक कार्यक्रम गर्ने र पछि अनिश्चितकालीन आमहड्ताल गर्ने कार्यक्रम यसअघि नै सार्वजनिक गरिएको छ ।