पूर्वराजा ज्ञानेन्द्रलाई १७ साल दोहोर्याउन राजावादीहरुले दबाब दिने

राजसंस्था पुनर्स्थापनाको अभियान चलाइरहेको राष्ट्रवादी नागरिक समाजले चैत १७ गते काठमाडौँमा जुलुस निकाल्ने निर्णय गरेका छन् । पूर्वराजा ज्ञानेन्द्र शाहलाई सक्रिय गराउन राजावादीहरु सडकमा निस्कन लागेका हुन् ।  

२०१७ साल दोहोर्याउन पूर्वराजा शाहलाई दबाब दिने उद्देश्यले बृहत जुलुस र सभा गर्न लागिएको समाजले जनाएको छ । सभा चैत १७ गते शुक्रबार रत्नपार्कस्थित शान्ति वाटिकामा हुने छ । 

०१७ सालमा तत्कालीन राजा मेहन्द्रले सैन्यबलमा जननिर्वाचित सरकारलाई अपदस्थ गरी निरंकुश शाही शासन शुरु गरेका थिए । दलमाथि प्रतिबन्ध लगाइएको उक्त घटनापछि २०४६ सालसम्म मुलुकमा पञ्चायती शासन चलेको थियो । लोकतन्त्रको घाँटी निमोठिएको उक्त दिनलाई राजवादीहरुले उत्सवका रुपमा मनाउने गरेका छन् ।

प्रजातन्त्रवादीहरुले भने महेन्द्रको त्यस कदमलाई कालो दिनका रुपमा लिने गरेका छन् ।