एयर इण्डियाको विदेश उडानमा विशेष ‘मेनु’
भारतको राष्ट्रिय ध्वजावाहक वायु सेवा कम्पनी एयर इण्डियाले अन्तर्राष्ट्रिय रुटमा यात्रा गर्ने यात्रुहरुलाई लक्षित गरेर खानाका विभिन्न परिकार समेटिएको मेनु तयार पारेको छ । एयर इण्डियाको उडानमा अन्तर्राष्ट्रिय रुटमा यात्रा गर्नेले अब नयाँ खाना र पेय पदार्थ चाख्न पाउने बताइएको छ ।
एयरलायन्सले शाकाहारी यात्रुका लागि सागपात, अन्न र फलफूलबाट बनाइका खानेकुराको व्यवस्था गरिएको जनाएको छ । ट्वीटरमार्फत जानकारी गराउँदै एयरलायन्सले भनेको छ, ‘आफ्नो फस्र्ट र बिजनेश क्लासका शाकाहारी यात्रुका लागि शुद्ध शाकाहारी खानाको विकल्प ल्याएको छ ।’
यात्रुहरुलाई रेष्टुरेण्टझैं अनुभव गराउन खाना र पेय पदार्थको नयाँ मेनु बनाइएको एयरलायन्सका इनफ्लाइट सेवाका प्रमुख सन्दीप बर्माले बताए । यसले उडानमा यात्रुहरुले उत्कृष्ट अनुभव महशुस गर्ने उनको भनाइ छ ।
‘अतिथिहरुको उडान अनुभवलाई रुपान्तरण गर्न हामी निरन्तर प्रयासमा छौं । यो त्यसकै एक भाग हो । हामीले मेनुमा उत्कृष्ट खानेकुरा समावेश गरेका छौं’, उनले भने, ‘हाम्रा अतिथिका लागि आफ्नो मनपर्ने रेष्टुरेण्टमा जस्तै एयर इण्डियाका उडानमा खाना र पेय पदार्थको आनन्द दिन चाहन्छौं ।’
मेनुमा गौरमेट डिस, ट्रेन्डी एपेटाइजर, डिसेडेन्ट, डेजर्टहरु समावेश गरिएको छ । स्वस्थ खानपानसँगै भारतको स्थानीय खानालाई प्रोत्साहन गर्ने उद्देश्यले एयरलायन्सले यो व्यवस्था गरेको हो । यसका लागि खानपान साझेदार, आपूर्तिकर्ताको टोलीसँग साझेदारीसमेत गरिसकेको जानकारी दिएको छ ।
यसअघि संयुक्त अरब इमिरेट्सको इत्तेहाद एअरलाइन्सले पनि उडानमा यात्रुले रोजेको मेनुको आधारमा खाना र पेय पदार्थ उपब्ध गराउने व्यवस्था लागु गरिसकेको छ ।
ट्रेन्डिङ पोस्ट
टिप्पणीहरू