एकैदिन दुई हजार चिनियाँको ओइरो, केरुङमा एक लाख भेला

नयाँ वर्ष २०८० को अघिल्लो दिन छिमेकी मुलुक चीनबाट दुई हजार पर्यटक नेपाल घुम्न आउँदैछन् । चैत मसान्तको दिनदेखि हिमालय एअरलाइन्सको उडानमा ‘ग्रुप टुरिस्ट’ आउन लागेका हुन् ।

ती सबैलाई नेपालस्थित चिनियाँ राजदूत,पर्यटन मन्त्रालयका सचिवलगायत सरकारी अधिकारीहरुले त्रिभुवन अन्तर्राष्ट्रिय विमानस्थलमा स्वागत गर्ने तयारी छ । चिनियाँ पर्यटकहरु समूहमा आउन थालेपछि पर्यटन क्षेत्र थप चलायमान हुने विश्वास सरकारी अधिकारीहरुले व्यक्त गरेका छन् ।

यसबीच दूतावासको सैनिक र प्रशासनिक टोली केरुङको भ्रमण गरेर फर्केको बुझिएको छ । उता चीनले रसुवागढीदेखि केरुङसम्मको १६ किलोमीटर सडक मर्मत गर्न थालेको छ । पछिल्लो समय भत्केको सडक पुनर्निर्माण गरेर चीनले पर्यटक र आयात निर्यात व्यापारलाई सहज बनाउने उद्देश्य राखेको बताइन्छ । 

तर,चीनसँगको सबैभन्दा पुरानो तातोपानी नाका पूर्णरुपमा खुल्ने सम्भावना अझै देखिएको छैन । अप्रिल महिनामा केरुङमा भव्य पर्यटन मेला आयोजना गर्न लागिएको छ । मेलामा १ लाख चिनियाँको सहभागिता हुने छ । मेलामा सहभागीमध्ये केहीलाई नेपाल भ्रमणको निम्ति पहल गर्न पर्यटन बोर्डले त्यहाँ पुगेर पर्यटन प्रवर्धनसम्बन्धी कार्यक्रम गर्न लागेको बुझिएको छ । 

नयाँ वर्ष २०२३ लागेपछि पर्यटक संख्यामा राम्रो बढोत्तरी देखिन थालेको छ । मार्च महिनामा मात्रै ९९ हजार पर्यटक नेपाल भित्रिएका थिए । गत जनवरी र फेब्रुअरीमा १ लाख २० हजार आए । पछिल्लो तीन महिनामा दुई लाख २० हजार विदेशी पर्यटक नेपाल आएका छन् । यो हिसाबले वर्षको अन्तसम्ममा १० लाख पुग्ने प्रक्षेपण गरिएको छ । तीन महिनामा सबैभन्दा धेरै भारतीय, त्यसपछि युरोप, अमेरिका र चीनबाट  नेपाल आएका छन् ।