नापीका हाकिम भ्रष्टाचारमा तानिए, कागजमा जग्गाको क्षेत्रफल बढाएको अभियोग

अख्तियार दुरुपयोग अनुसन्धान आयोगले भ्रष्टाचार गरेको अभियोगमा नापी कार्यालय चाबहिलका तत्कालिन प्रमुख नापी अधिकृतमाथि मुद्दा चलाएको छ । 

अधिकृत दुर्गादास महर्जनले विभिन्न व्यक्तिसँगको मिलेमत्तोमा आफूखुशी नक्सामा जग्गा जोड्नुका साथै हुँदै नभएको क्षेत्रफललाई पनि गैरकानूनी तरिकाले कित्ताकाट गरेको भन्दै अख्तियारले आज विशेष अदालतमा मुद्दा दायर गरेको छ । उनीसहित अन्य आठ जनाविरुद्ध भ्रष्टाचार मुद्दा चलाइएको अख्तियारले जनाएको छ । 

प्रमुख नापी अधिकृत महर्जन, नापी अधिकृत रविशंकर पाण्डेय र सर्भेक्षक रामनारायण यादवले मूलपानी १ ख कित्ता नम्बर ७०८, ७०९, ६६६ र ८१३ को कित्ताकाट गर्ने क्रममा सरकारी कागजातमा अनाधिकृत रुपमा कित्ताहरुको आकारप्रकार परिवर्तन गरी नक्सा सच्याइएको अख्तियारको दाबी छ । 

त्यस्तै, यस कार्यमा मालपोत कार्यालय चाबहिलका तत्कालिन मालपोत अधिकृत विष्णुप्रसाद काफ्ले, नायव सुब्बा उत्तम कुँवर, झापाको कमल गाउँपालिका–२ का योगेन्द्र आचार्य, काठमाडौँको कागेश्वरी मनोहरा–९ का सिताराम अधिकारी र काठमाडौँ महानगरपालिका–९ का नवीन दाहालको पनि संलग्नता रहेको अख्तियारको अभियोग पत्रमा उल्लेख छ ।
 
आयोग प्रवक्ता भोला दाहालका अनुसार आचार्य, अधिकारी र दाहालले आफूलाई आर्थिक लाभ प्राप्त गर्ने उद्देश्यले अनाधिकृत रुपमा कित्ताहरुको आकारप्रकार परिवर्तन गरी टायल चोकबाट क्षेत्रफल बढाएर गलत लिखत पारित गर्न मतियारको रुपमा सहयोग पुर्याएको अनुसन्धानबाट खुलेको छ । 

आठै जनालाई भ्रष्टाचार निवारण ऐन, २०५९ को दफा २२ को प्रतिबन्धात्मक वाक्यांशमा उल्लेख भएबमोजिम मुख्य कसूरदारलाई हुने सजायसरह सजायको मागदाबी गरिएको छ ।