कोरियन एअरले लिँदै आएको दोब्बरबढी भाडाबारे पर्यटनमन्त्रीको सोधखोज

वैदेशिक रोजगारीमा दक्षिण कोरिया जाने नेपाली यात्रुसँग महँगो हवाई भाडा लिएको सम्बन्धमा सरकारले इपिएस कोरियासँग जवाफ मागेको छ । संस्कृति, पर्यटन तथा नागरिक उड्डयन मन्त्रालयले इपिएसलाई जवाफ लेखेर पठाउन पत्र लेखेको छ ।

मन्त्री सुदन किरातीले श्रम मन्त्रालयमार्फत यसबारे इपिएसलाई ६ वटा प्रश्नको जवाफ पठाउन भनिएको जानकारी दिनुभयो । उहाँका अनुसार इपिएससँग कोरियन एयरमा कोरिया जाने टिकटको लागत के कति हो ? भनेर सोधिएको छ । 

त्यस्तै, टिकटबाट प्रतिव्यक्ति नाफा कति ? र कति प्रतिशत बढाउन पाउने नियम छ ? भनेर पनि सोधिएको बताइन्छ । कोरियन एयरले हालसम्म एकलौटी कति यात्रु बोके भनेर पनि प्रश्न सोधिएको मन्त्री किरातीले जानकारी दिनुभयो ।   

उहाँका अनुसार समग्रमा हालसम्मको टिकट बजेटबारे इपिएससँग जवाफ मागिएको हो । त्यसैगरी कोरियन एयरले १ लाख ८५ हजार रुपैयाँ भाडा लिने गरेकोमा ट्रान्जिट भएर जाँदा अन्य विमान कम्पनीबाट ७० हजार मात्र भाडा लाग्ने गरेको विषयमा पनि इपिएसलाई जवाफ पठाउन मन्त्रालयले भनेको छ ।