प्रहरीको व्यापक खोजीमा रहेका एमाले सचिव सडकमार्ग हुँदै मध्यरातमा राजधानी छिरे

एमाले सचिव, पूर्वमन्त्री तथा सांसद टोपबहादुर रायमाझी गएराति काठमाडौं छिरेका छन् । हिजो राति साढे ८ बजे भैरहवाबाट बुद्ध एअरको उडानमा काठमाडौं आउने योजनामा रहेका उनी राति साढे ९ बजेको उडानमा टिकट सारेर बेखबर भएका थिए ।

सोही समयमा छोरा सन्दीप बुटवलमा पक्राउ परेपछि रायमाझी रातारात सडकमार्गबाट काठमाडौं आइपुगेको बताइन्छ । अस्ति साँझ भैरहवा हुँदै अर्घाखाँची गएका सचिव रायमाझी हिजो दिनभर सभामुख देवराज घिमिरेसँगै जिल्लाको एउटा विद्यालयमा आयोजित कार्यक्रममा सहभागी भएका थिए ।

अस्ति सभामुखसँगै उता गएका उनी हिजो साँझ पनि सँगै आउने टिकट लिएका थिए । तर प्रहरीको पक्राउ पुर्जी जारी भएको सूचना र छोरा पक्राउको खबरपछि उडान छाडेर रायमाझी राति नै सडकमार्गबाट काठमाडौं आएका हुन् ।

यता रायमाझीलाई पक्रन हिजो राति काठमाडौं विमानस्थलमा प्रहरीको एउटा टोली तम्तयार भएर बसेको थियो । छोरालाई भने हिजो राति बुटवल प्रहरी कार्यालयको हिरासतमा राखेर अहिले बिहान साढे ९ बजे बुद्ध एअरको उडानमा काठमाडौं ल्याइएको छ ।
नेपाली नागरिकलाई नक्कली भुटानी शरणार्थी बनाएर अमेरिका पठाउने प्रकरणमा पूर्वमन्त्री रायमाझी, उनका छोरा सन्दीपलगायतको नाम मुछिएको छ । हिजो बिहान उपराष्ट्रपतिको कार्यालयमा रहेका सचिव टेकनारायण पाण्डे, अस्ति तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई र केही साताअघि अन्य पाँच जना पक्राउ परिसकेका छन् ।

प्रहरीका अनुसार बादलका छोराविरुद्ध पक्राउ पुर्जी जारी भएको छ भने राईका छोरा पनि निगरानीमा छन् । हालसम्मको बयानका आधारमा पक्राउ परेका सबैले मन्त्रीबाट भएको नीतिगत व्यवस्थाको आधारमा उक्त कामको थालनी गरिएको संकेत गरेका हुन् ।