अभियुक्त पत्रकारको मोबाइल बोकेर भ्याली एआइजी दुबई गएको आरोप

काठमाण्डौ उपत्यका हेर्ने प्रहरी अतिरिक्त महानिरीक्षक (एआइजी) श्याम ज्ञवाली यतिखेर दुबई भ्रमणमा छन् । तर, उनैको साथमा अहिले नेपाल टेलिकमको सिमकार्ड हालिएका तीन वटा मोबाइल सेट रहेको बताइएको छ । उनी आफ्नो निजी नम्बरको मोबाइल सेट र सरकारी कागजात किर्तेमा २५ दिन थुनिएर धरौटीमा अदालतबाट छुटेका एक जना ‘पत्रकार’ को दुई वटा सेट बोकेर दुबई उडेको आरोप लागेको छ ।

पृष्ठभूमि पत्रकारिता नभए पनि मदनबाबु भण्डारी स्वयमलाई प्रहरी वृत्तमा प्रहरीका हाकिमनिकट पत्रकार भनी चिन्ने गरिन्छ । तर उनी पेशाले यातायात क्षेत्रका हुन् । उनै भण्डारीको दुई वटा मोबाइल सेट एआइजीले गत हप्ता दुबई लगेको आरोप लागेको हो ।

भण्डारी तत्कालीन नवराज सिलवाल समूहका सहयोगीको रुपमा प्रहरी गुटबन्दीमा सँलग्न रहेको कतिपयको बुझाइ छ । सर्वेन्द्र खनालहरु नेतृत्वमा आएपछि उनलाई प्रहरी मुख्यालयबाट लगभग बाहेक गरिएको थियो । तर यसअघिका प्रहरी महानिरीक्षक धिरजप्रताप सिंहले भने मन पराएकै बुझिन्छ ।  

राजनीतिक खेलकुदमा निकै दौडने भण्डारी डिआइजी अशोक सिंहको प्रमाणपत्र विवादमा पनि तानिएका थिए । प्रहरीको कर्मचारी प्रशासनबाट सिंहको कागजात थुतेर उनले छरपष्ट पारेको आरोप त्यतिबेलै लागेको थियो । यता सिंहको जागिर पनि सोही कारणले गयो । 

उता श्यामलाल ज्ञवालीविरुद्ध मदन भण्डारीकै पहलमा अख्तियारमा उजुर पर्यो । सम्भवतः भुटानी प्रकरण सतहमा नआएको भए ज्ञवालीको  जागिर २०७९ सालमै अख्तियारले  सकाइदिने अनुमान थियो । उक्त उजुरी तामेलीमा गएपछि आफूविरुद्ध  प्रतिशोध साँधिएको एकै भेगक  मदन भण्डारीको गुनासो छ । 

यसबीच एआइजी ज्ञवालीकी श्रीमतीसहित केही प्रहरी अधिकृतमाथि काठमाडौंका क्यासिनोबाट उठतीपुठ्ती गरेको हल्ला चलाउने काममा पनि भण्डारी सँलग्न रहेको र एसएसपी जीवन श्रेष्ठलाई मानव बेचविखनबाट काठमाडौं प्रहरी परिसरमा सरुवा गर्न लागिएको खबर चुहाउने काम त्यहीबेला भयो । त्यसको सूत्रधार पनि भण्डारी नै रहेको  पत्ता लाग्यो । एसएसपी श्रेष्ठ गृहमन्त्री नारायणकाजी श्रेष्ठको गाउँले भतिजो रहेकाले पनि उक्त हल्लाले बल पाउने नै भयो ।

यी सबै प्रमाण भेटिएपछि उनै मदनलाई विमानस्थलबाट पक्राउ गरेर सरकारी कागज किर्तेमा थुनियो । ल्यापटप र मोबाइल  जफत गरी परीक्षणको लागि मोबाइल सेट फरेन्सिक ल्याबमा पठाइयो । 

उनीविरुद्धको मुद्दा काठमाडौं जिल्ला अदालतमा अहिले पनि विचाराधीन छ । 

हिरासतबाट छुटेपछि प्रहरीले सामान फिर्ता नगरेको भन्दै भण्डारीले काठमाडौं जिल्ला अदालतमा प्रहरीविरुद्ध मुद्दा हाले । अदालतले रिहा भएका भण्डारीलाई सामान बुझाउन आदेश दियो । 

शुक्रबारको उक्त आदेश प्रहरी हेडक्वार्टरमा बुझाइएको छ ।  यसैमा भण्डारी भन्छन्, ‘आईफोन १२ र प्रोम्याक्स १४ मेरा फोन हुन् । प्रहरीले छोरीले बोक्ने आइप्याड र ल्यापटपसमेत लगेको छ,जसमध्ये दुइटा फोन एआइजीले दुबई लिएर जानुभएको छ ।’

भण्डारीमाथि ऊबेलाका डिआइजी नवराज सिल्वाललाई आइजिपी बनाउन पनि  कासमूलगायत सरकारी कागजात कीर्ते गरेको आरोप छ । सिलवालको कार्य सम्पादन मूल्याङ्कन कीर्ते भएको बताउँदै प्रहरी महानिरीक्षकको सचिवालयस्थित उच्च श्रोतले भनेको छ, ‘भण्डारी पर्दा बाहिर बसेर प्रहरीभित्र चलखेल गर्ने व्यक्ति हुन् । उनले कान्छी श्रीमतीपट्टीबाट जन्मेको बच्चालाई पनि सरकारी कागजात किर्ते गरी साँगास्थित प्रहरी स्कूलमा भर्ना गरेको र बहुविवाहलाई छोपछाप गरेको पाइएको छ । ’