धर्ना बसेकी महिलालाई मेयरले थुनाएपछि स्थानीयको विरोध

संस्थागत कलेजलाई बजेट नदिन माग गर्दै विराटनगर महानगरपालिकाको मूलगेटअगाडि शान्तिपूर्ण धर्नामा बसेकी महिलालाई मेयरले पक्राउ गराएका छन् । मेयर नागेश कोइरालाले अभद्र व्यवहारको आरोप लगाएपछि उनलाई प्रहरीले पक्रेको हो ।

 गत सोमबार धर्ना बसेकै अवस्थामा पक्राउ गरिएकी विराटनगर- ५ की ५२ वर्षीया ईन्दिरा चापागाईं थप सात दिन प्रहरी हिरासतमा बस्ने भएकी छिन् । विराटनगरको बरगाछीस्थित गोग्राह माध्यमिक विद्यालयको पूर्वसञ्चालक समितिकी अध्यक्ष चापागाईंले सोही विद्यालयमा गोग्राह नामको निजी कलेज सञ्चालन गरेर महानगरबाट बजेट ल्याएर खाइरहेको आरोप लगाएकी छिन् ।

महानगरले कि सामुदायिक भनेर कलेजलाई दिँइदै आएको बजेट बन्द गर्नुपर्ने अन्यथा सो कलेजलाई सामुदायिक बनाउनुपर्ने उनको माग छ । महानगर र जिल्ला प्रशासन कार्यालय, मोरङ्गमा समेत यो विषय उठान गर्दै निवेदन दर्ता गराएकी चापागाईं आफ्नो माग सुनुवाई नभएपछि धर्ना बसेकी हुन् ।   

उनका अनुसार स्नातक तहमा बिएड पठनपाठनका लागि पूर्वाञ्चल विश्वविद्यालयबाट सम्बन्धन लिइएको थियो । आफ्नो पालोमा सो कलेज विद्यालय मातहत नै रहेको र कलेजको आम्दानी सबै विद्यालय कोषमा जम्मा हुने गरेको उनको भनाइ छ । तर, सञ्चालन समिति फेरिएपछि उक्त कलेजलाई निजी बनाएर अलग्गै सञ्चालन गर्न थालिएको चापागाईंले बताएकी छिन् । 

आफूलाई सुशासन अभियन्ता बताउँदै आएकी उनले यसको चर्को विरोध गरेकी थिइन् । सामुदायिक कलेजलाई निजीकरण गरेर सञ्चालक समितिले विद्यार्थी र महानगरलाई लुट्दै आएको उनको आरोप छ । शैक्षिक संस्थामा देखिएको विकृति सुधारको माग गर्दै धर्नामा बसेकी उनलाई मेयर कोइरालाले थुनाएपछि स्थानीयले विरोध जनाएका छन् । 

चापागाईंले आफूलाई जथाभावी गाली गर्दै थुकेको मेयर कोइरालाको दाबी छ । चापागाईं गत सोमबारदेखि जिल्ला प्रहरी कार्यालय, मोरङ्गको हिरासतमा छिन् । आफूमाथि झुठ्ठा आरोप लगाएर फसाउन खोजेको भन्दै उनले हिरासतमै विरोध गरिरहेकी छिन् । महानगरको गेटअगाडि धर्ना बस्दा आफूले फुटपाथसमेत अवरोध नगरेको उनले बताइन् । 

भ्रष्टाचार र अनियमितताको विरोधमा आवाज उठाउने चापागाईंलाई केहीले ‘दिमाग फुस्केकी आईमाई’ पनि भन्ने गरेका छन् । उनी नेपालको झण्डा बोकेर कहिले जिल्ला अदालत त कहिले प्रशासनअगाडि उभिरहेकी हुन्छिन् । कविको समेत पहिचान बनाएकी उनी समाजसेवा गर्न रुचाउँछिन् ।

चापागाईंका श्रीमान अशोक र छोरी अदितीले भ्रष्टाचारविरुद्ध संघर्ष गर्दा मानसिक अवस्था ठीक नभएको आरोप लगाइएको गुनासो गरे । महानगर र प्रशासनमार्फत उनको मानसिक रोगको चेकजाँच गर्नुपर्ने र चिकित्सकले प्रमाणित गरेमा निःशुल्क उपचारको व्यवस्था मिलाउनुपर्ने परिवारको माग छ । 

जायज माग राखेर शान्तिपूर्ण धर्ना बसेकी महिलालाई पहुँच र पावरको आडमा थुनाउनु गलत भएको भन्दै विराटनगरमा व्यापक आलोचना हुन थालेको छ । यद्यपि, कुनै भ्रष्टाचार विरोधी र सुशासनका पक्षधर भने उनको पक्षमा बोलेका छैनन् । डेरामा बस्दै आएकी चापागाईंको श्रीमान निजी स्कुलको बस चलाउँछन् । 

उनको एक छोरी र छोरा छन् । २०७१ सालमा सो विद्यालयको अध्यक्ष हुँदा उनले शैक्षिक संस्थामा हुने भ्रष्टाचारविरुद्ध संघर्ष गरेकी थिइन् । विद्यालय सुधार्नुपर्ने माग राख्दै उनी त्यतिबेला अनशन बसेकी थिइन् । तत्कालीन प्रधानाध्यापक विष्णुबहादुर भुजेलले उनीविरुद्ध गाली बेईज्जती मुद्दासमेत दर्ता गरेका थिए । जिल्ला र उच्च दुवै अदालतले उनको पक्षमा फैसला गरेको थियो ।