नागार्जुनलाई चाहियो पशु डाक्टर

काठमाडौंको नागार्जुन नगरपालिकाले करारमा कर्मचारी भर्नाको तयारी गरेको छ । नगरपालिकाले पशु चिकित्सक र कृषि स्नातक पदमा नियुक्ति प्रक्रिया अघि बढाएको हो । 

आज सूचना प्रकाशित गर्दै नागार्जुनले योग्यता पुगेका इच्छुकलाई आगामी पन्ध्र दिनभित्र रित पुर्याएर आवेदन दिन भनेको छ । आवेदक ३५ वर्ष ननाघेको हुनुपर्ने जनाइएको छ । 

पशु चिकित्सकमा आवेदन दिनका लागि मान्यता प्राप्त विश्वविद्यालय वा शैक्षिक संस्थाबाट पशु चिकित्सा विषयमा कम्तीमा स्नातक तह उत्तीर्ण गरेको हुनुपर्छ । कृषि स्नातकका लागि कृषि विज्ञानमा कम्तीमा स्नातक तह उत्तीर्ण गरेको हुनुपर्ने जनाइएको छ । 

आवेदनमा संलग्न गर्नुपर्ने कागजात उम्मेदवारको शैक्षिक योग्यताको प्रमाणित प्रतिलिपि, परिषद् दर्ता प्रमाणपत्रको प्रतिलिपि (पशु चिकित्सकको हक), नेपाली नागरिकता प्रमाणपत्रको प्रमाणित प्रतिलिपि तथा पेश गरिने सबै प्रतिलिपिको पछाडि उम्मेदवार स्वयमले हस्ताक्षर गरी प्रमाणित गरेको हुनुपर्ने पनि सूचनामा उल्लेख छ ।