सन्दिप लामिछानेको मुद्दामा फैसला आएन, पीडित किशोरीकी आमाको नागरिकता झिकाउन आदेश

क्रिकेटर सन्दीप लामिछाने विरुद्धको बलात्कार मुद्दामा काठमाडौं जिल्ला अदालतले पीडित किशोरीकी आमाको जन्ममिति यकीन गर्न आदेश दिएको छ ।

न्यायाधीश राजुकुमार खतिवडाको एकल इजलासले आज मुद्धाको सुनुवाई गर्दै उक्त आदेश दिएको हो । इजलासमा पेश भएका कागजपत्रमा पीडित किशोरीकी आमाको जन्ममिति दुईवटा देखिएको भन्दै अदालतले जन्ममिति प्रमाणीकरणपछि मात्र बहस हुनेसमेत आदेश सुनाएको छ ।

सन्दीप पक्षले किशोरीको जन्ममिति गलत भएको र उनी नाबालिग नभएको जिकिर गर्दै प्रमाण पेस गरेको थियो । 

उमेर नपुगेकी किशोरी बलात्कारको आरोपमा सन्दीपविरुद्ध २०७९ भदौ २१ गते गौशाला प्रहरी वृत्तमा जाहेरी परेको थियो भने कात्तिक १८ मा जिल्ला अदालतले पुर्पक्षका लागि थुनामा राख्न आदेश दिएको थियो । तर, उच्च अदालत पाटनले जिल्लाको आदेश उल्टाएपछि सन्दिप रिहा भएका थिए । 

शर्तसहित २० लाख धरौटीमा छाड्ने उच्चको उक्त आदेशविरुद्ध सरकारी पक्ष सर्वोच्च अदालत पुगेको थियो । सर्वोच्चले उच्चको आदेश सदर गर्दै फास्ट ट्रयाकबाट मुद्दा किनारा लगाउन फागुन १५ गते अर्को आदेश दिएको थियो । 

तर, किशोरीको उमेर यकीन नहुँदा अड्किदै आएको मुद्दा उनकी आमाको नागरिकताका कारण पुन: लम्बिएको हो ।