सुन तस्कर समात्न अन्तर्राष्ट्रिय प्रहरीको सहारा

पछिल्लो सुन तस्करी प्रकरणमा संलग्न तस्करलाई पक्राउका लागि नेपाल प्रहरीको केन्द्रीय अनुसन्धान ब्युरो (सिआइबी) ले अन्तर्राष्ट्रिय प्रहरी संगठनसँग पत्राचार गरेको छ । उक्त प्रकरणमा विदेशी नागरिकको समेत संलग्नता रहेको र केही नेपाली तस्कर विदेशमा रहेकाले पक्राउको निम्ति आग्रह गरिएको बताइएको छ ।

ब्युरोले इन्टरपोल हङकङ र भारतलाई सहयोगको निम्ति पत्राचार गरेको बुझिएको छ । यस प्रकरणमा केही भारतीय र चिनियाँ नागरिकको संलग्नता रहेको पाइएको छ । हालसम्म नेपाली, चिनियाँ र भारतीय गरेर २३ जना पक्राउ परिसकेका छन् । मुख्य तस्करको रुपमा  राकेश अडुकिया भारत हुँदै दुबई पुगेको आशंका गरिएको छ ।

उननका छोरा रोहनलाई भने प्रहरीले साउन २६ गते नियन्त्रणमा लिएर छाडेको छ । रोहन नयाँ दिल्लीबाट हवाई उडानमा काठमाडौं आउँदै गर्दा त्रिभुवन अन्तर्राष्ट्रिय विमानस्थलबाट पक्राउ परेका थिए ।

गत साउन ३ गते राजस्व अनुसन्धान विभागले पक्राउ गरेको सुन नेपाल राष्ट्र बैंकको टक्सार महाशाखामा गालेर तौलेपछि ६० किलो सात सय १६ ग्राम कायम हुन आएको छ । यतिखेर सुन प्रकरणको अनुसन्धान सिआइबीले गरिरहेको छ । 

संसदले यसको छानबिन गर्न उच्चस्तरीय आयोग बनाउने निर्णय भएको छ । सिआइबीको अनुसन्धान पूरा भएपछि आयोगले कार्य थालनी गर्ने प्रमुख राजनीतिक दलहरुबीच सहमति छ ।