बेलायतमा नेपाली गायिकामाथि यौन शोषण गर्न खोज्ने शारदा आफै अप्ठेरोमा

आफूलाई बेलायत पुर्याएर यौन शोषण गर्न खोजेको वास्तविकता खुलाएकी नेपाली गायिकालाई अघिल्लो साता त्यहाँको गृह मन्त्रालयले भीजा रध्द र प्रहरीले निकै खोजबिन गरेतापनि अहिले भने परिस्थिति ठ्याक्कै उल्टिएको छ । सांगीतिक कार्यक्रममा सहभागिता जनाउन नेपालबाट बेलायत लगिएकी उनले आफूमाथि आयोजक संस्थाका हर्ताकर्ताले होटलमा यौन सम्बन्ध राख्न आग्रह गरेको खुलासा गरेलगत्तै प्रहरीले खोजी गरेको खबर बाहिरिएको थियो । 

३१ वर्षीया गायिका सीमा गुरुङ (नानु) लाई ह्याम्पसायर प्रहरीले उनको मोबाइलमा म्यासेज पठाउँदै सम्पर्कमा आउन सन्देश दिएको थियो । प्रहरीले त्यहाँको १०९ वा ९९९ मा फोन गरेर सम्पर्कमा आउन वा पठाइएको म्यासेजको जवाफ दिनसमेत अनुरोध गरेको थियो ।

उनलाई बेलायत लाने स्पोन्सर संस्था स्याङ्जा समाज युकेका अध्यक्ष शारदा गुरुङले नाजायज सम्बन्ध राख्न पटक पटक दबाब दिएको उनले फेसबुक लाइभमा बताएकी थिइन् ।

उनी साढे ३ महिनाअगाडि २८ मेका दिन एउटा टोलीमा बेलायत पुगेकी हुन् । सांस्कृतिक कार्यक्रममा अरु हरु ५ सेप्टेम्बरमा नेपाल फर्के पनि उनी उतै अड्किइन् । अध्यक्ष शारदाले भने नानुसँग ‘मैले तिमीलाई नेपालबाट ल्याएको के फाइदा,होटल जाऊँ’ भनेको उनले बेलायतबाट गरिएको फेसबुक लाइभमा वास्तविकता उजागर गरेकी थिइन् । 

तर, अहिले बेलायती प्रहरीले उनै शारदालाई खोजेको छ । नानुले सेप्टेम्बर ९ तारिखका दिन बेलायती अधिकारीहरुसमक्ष आफूलाई स्पोन्सर संस्थाका अध्यक्षले यौन शोषण गर्न खोजेको,असुरक्षित महसुस भएको जनाएपछि उनलाई यसअघि दिएको नोभेम्बर ११ तारिखसम्म छ महिनाको भीसा कायम भएको जानकारी दिइएको छ । युके ल्याउँदाका स्पोन्सरले गर्न खोजेको गलत कार्यप्रति संवेदनशील हुँदै त्यहाँको गृह मन्त्रालय (होम अफिस) ले बेलायतमा छँदा कुनै असुरक्षित महसुस भएमा स्थानीय प्रहरी कार्यालय वा टेलिफोन नम्बर १०१ र ९९९ मा सम्पर्क गर्न भनेको छ ।

मोबाइलमा पठाइएको जानकारीमा बेलायती मन्त्रालयले यौन दुर्व्यहार भएको अवस्थामा आवश्यक सहयोगको निम्ति उपलब्ध गराइएको वेवसाइट लिंक खोल्न पनि अनुरोध गरेको छ । पछिल्लो घटनाले गायिकालाई होटलमा लगेर यौन सम्बन्ध राख्न खोज्ने शारदा स्वयम् अप्ठेरोमा परेको बताइन्छ । बेलायतमा अनिच्छित यौन सम्बन्ध वा त्यसका लागि गरिएको प्रयास र प्रस्तावलाई ठूलै अपराध मानिन्छ । 

गायिका सीमा यसअघि उनै शारदाकी भाञ्जीको घरमा बसेकी थिइन् । बदनियत राखेर आफूसँग गलत सम्बन्धको प्रस्ताव गरेपछि रातारात भागेर अन्य नातेदारको घरमा पुगेको सीमाको दाबी छ । ‘मलाई डेट चाहिँ  याद भएन । किनभने मलाई मेन्टल्ली टर्चर दिइएको थियो । डेट याद गर्न सकिँन,’ उनले शारदा गुरुङ्गले राखेको प्रस्ताव र घटनाक्रम उल्लेख गर्ने क्रममा रुँदै भनेकी थिइन्, ‘मलाई ल्याउनासाथ स्याङ्जा समाज युकेका अध्यक्षले उहाँको भाञ्जीको घरमा राख्नुभयो । म एक हप्ता त्यो घरमा बसेँ । एक हप्तापछि उहाँले मलाई फिजिकल रिलेसनसिपको प्रस्ताव राख्नुभयो । मैले इग्नोर गरेँ । मैले दाइभाइ भनेर यत्रो सपना बुनेर आएको । किन यस्तो प्रस्ताव राख्नुहुन्छ ? दाई म यो टाइपको मान्छे होइन भन्दै रोएँ ।’

शारदाको जवाफ उल्लेख गर्दै उनले फेसबुक लाइभमा भनिन्, ‘मैले यत्रो खर्चेर युकेसम्म ल्याएँ ।’ गायिकाको जवाफ थियो, ‘सरी म त्यो टाइपको केटी होइन । मलाई नेपाल रिटर्न पठाइदिनुस् ।’

यसैबीच गैरकानुनी रुपमा बेलायतमा बसेको भनिएकी नानु गुरुङलाई शकुन्तला गुरुङले लुकाएको वा संरक्षण दिएको भन्ने आशंकालाई शकुन्तलाले गलत भनेकी छन् । उनले आफू बस्दै आएको ६४ कार्मार्थेन क्लोज जियु १४८ टीएचस्थित निवासमा जोसुकैले हेर्न र खानतलासी लिन सक्ने उनले बताइन् ।   

शकुन्तलाले जनआस्थासँगको कुराकानीमा भनिन्, ‘बेलायतमा गैर कानुनी जो कोहीलाई आश्रय दिनु भनेको कानुनी रुपमा बसेकाहरु नै अप्ठेरोमा पर्नु हो । त्यो काम म गर्न सक्दिँन । कम्तीमा १० हजार पौण्ड जरिवाना तिर्नुपर्छ ।’ उनले अगाडि भनेकी छन्, ‘एनआरएनए युकेको बैंक खाताबाट रकम हिनामिना गरेको कुरामा कुनै सत्यता छैन । बरु उल्टै २३ सयभन्दा बढी पौण्ड विभिन्न व्यक्तिसँग लिन बाँकी छ ।’