रिगलको कैद मिनाहाबारे सर्वोच्चले भोलि निर्णय सुनाउने

जघन्य अपराधका दोषीलाई गरिएको कैद मिनाहा खारेज गर्न माग गर्दै भारती शेर्पाले दायर गरेको मुद्दामा सर्वोच्च अदालतले भोलि आदेश सुनाउने भएको छ । 

मुद्दाको सुनुवाई सकिएसँगै भोली निर्णय सुनाउने तयारी भएको सर्वोच्चका प्रवक्ता भद्रकाली पोखरेलले जानकारी दिए । कायममुकायम प्रधानन्यायाधीश ईश्वरप्रसाद खतिवडा, न्यायाधीशहरु सपना प्रधान मल्ल, डा. कुमार चुडालको इजलाशमा हिजो र आज सुनुवाई भएको थियो । 

श्रीमान् चेतन मानन्धरको हत्यारा योगराज ढकाल ‘रिगल’ को कैद सजाय मिनाहा गर्ने राष्ट्रपति रामचन्द्र पौडेलको निर्णयविरुद्ध शेर्पाले सर्वोच्चमा रिट हालेकी थिइन् । रिगललाई पुन: थुनामा पठाउन माग गर्दै भारती माइतीघर मण्डलामा अनशन बसेकी छिन् । 

रिगलले २०७२ असार २८ गते नेपालगञ्जका चेतनलाई खुँडा प्रहार गरी हत्या गरेको ठहर गर्दै तीनै तहका अदालतले सर्वस्वसहित जन्मकैदको सजाय सुनाएको थियो ।