सालोले भिनाजुलाई खुकुरीले छप्काए, रक्सीले मातेकी महिलाको कुटाइबाट वृद्ध बिते

खुकुरीले छप्काएर आफ्नै भिनाजुको हत्या गरेको अभियोगमा झापाका एक युवा समातिएका छन् ।

घरायसी विवादमा भिनाजु ४५ वर्षीय धन बहादुर कट्वाललाई खुकुरी र बाँसले हानेर हत्या गरेको आरोप लागेका बुद्धशान्ति गाउँपालिका–५ का ३५ वर्षीय रोशन अधिकारीलाई प्रहरीले पक्राउ गरेको हो ।

खुकुरी प्रहारबाट गम्भीर घाइते भएका कट्टवालको प्रादेशिक अस्पताल भद्रपुरमा उपचारको क्रममा मृत्यु भएको र त्यसमा रोशनको संलग्नता देखिएको प्रहरीले जनाएको छ । घटनाको खबर प्राप्त हुनासाथ ईलाका प्रहरी कार्यालय बुधबारेबाट खटिएको प्रहरीले उनलाई खुकुरीसहित पक्राउ गरेको हो । 

यता, पर्साको पर्सागढी नगरपालिका–४ हरदासपुर टोल बस्ने ५८ वर्षीय राजिन्द्र रामलाई कुटेर मारेको अभियोग लागेका स्थानीय ५० वर्षीय आशा चौधारीलाई प्रहरीले पक्राउ गरेको छ । मादक पदार्थ सेवन गरी उनीहरूबीच सोमबार साँझ कुटपिट तथा झै–झगडा हुँदा गम्भीर घाइते भएका रामको एलएस न्यूरो अस्पतालमा उपचारको क्रममा मृत्यु भएको हो । 

दुवै घटनाका सम्बन्धमा प्रहरीले आवश्यक अनुसन्धान गरिरहेको जनाएको छ ।