नयाँ दिल्ली उड्न लागेका भारतीयको हाते झोलामा आठ लाखको मुठो

काठमाडौंबाट भारतको नयाँ दिल्ली जान लागेका दुई जना भारतीय नागरिकको हाते झोलामा अवैध भारतीय रुपैयाँ फेला परेको छ । हिजो साँझ ५ बजे भिस्तारा एअरको उडान नम्बर युके १५६ मा जाने तयारीमा रहेका उनीहरुको अन्तिम सुरक्षा जाँचको क्रममा आठ लाख भारु भेटिएको हो ।

भोटर आईडी एक्सबीएक्स १२५१६६९ र एक्सबीएक्स १७४४५४९ देखाएका ३५ वर्षे पंकज गुप्ता र धर्मेन्द्र नगरको हाते झोलामा चार चार लाख रुपैयाँ भारतीय पाँच सय दरका नोट फेला परेको बताइन्छ । 

गएराति महानगरी प्रहरी वृत्त गौशालाको हिरासतमा राखिएका ती दुबैलाई आज कार्यालय खुलेपछि थप अनुसन्धान र कारबाहीको निम्ति राजश्व अनुसन्धान विभाग हरिहरभवनमा बुझाइने प्रहरीको भनाई छ ।