अध्यागमनका हाकिमको बयानपछि गिरोहका थप दुई जना पक्राउ

अध्यागमन अधिकृतसँग सेटिङ मिलाई भिजिट भिसामा नेपालीलाई विदेश पठाउँदै आएका दुई जनालाई प्रहरीले पक्रेको छ । 

काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनीहरुलाई आज नियन्त्रणमा लिएको हो । पक्राउ परेकामा निमा छिरिङ ट्राभल्सका सञ्चालक काभ्रेपलाञ्चोकका ३७ वर्षीय मनोज तामाङ र नाताले उनका सालो एवम् कार्यालयका कर्मचारी रामेछापका ३३ वर्षीय पदम लामा हुन् ।

उनीहरुले अध्यागमन अधिकृतसँग सेटिङ्ग मिलाएर भिजिट भिसामा युवालाई विदेश पठाउने गरेको प्रहरीको अनुसन्धानबाट पत्ता लागेको छ । प्रहरीले बुधबार त्रिभुवन अन्तर्राष्ट्रिय विमानस्थल अध्यागमन अधिकृत नरवीर खड्कालाई पक्राउ गरेको थियो । 

अनुसन्धानको क्रममा उनले नक्कली कागजातका आधारमा प्रतिव्यक्ति ४० हजारदेखि ५५ हजारसम्म रकम लिएर विदेश उडाउन सहजीकरण गरिदिने गरेको तथ्य खुलेको थियो । खड्कासँगको सम्बन्धका आधारमा तीनसय जनालाई विदेश पठाएको आरोपमा ट्राभल्सका सञ्चालक र कर्मचारीलाई पक्राउ गरिएको प्रहरीले जनाएको छ । 

पक्राउ परेका दुबैलाई लिखतसम्बन्धी कसुरमा आवश्यक कारबाहीका लागि प्रहरी परिसर टेकू पठाइएको छ ।