जग्गा चाहिने सरकारलाई, खेलोमेलो गर्ने दलाल

पोखरा महानगरपालिकाले आफ्नो ल्याण्डफिल्ड साइट प्रयोजनको लागि भन्दै जग्गा खरिदको तयारी गरेको एक वर्ष हुन लाग्यो तर खिचडी अझै पाकेको छैन । यसअघि बैनास्वरुप वडाध्यक्ष रामचन्द्र अधिकारीको खातामा गएको ५५ लाख रुपैयाँ विभिन्न आलोचना भएपछि ब्याजसहित फिर्ता भएको थियो । त्यही जग्गा खरिद प्रकरणमा अहिले भित्री अभ्यास भइरहेको बुझिन आएको छ फोहोर प्रशोधन केन्द्रका लागि भन्दै करिब ९० रोपनी जग्गा किन्न वैशाखदेखि जमर्को गरिँदै आएको छ । 

पोखरा ३३ मा पर्ने पुडिटारको झाँक्रीखोला र बरपौवा आसपास करिब ९० रोपनी खेतबारीको जग्गा खरिद प्रक्रिया भित्री रुपमा अगाडि बढेको छ । २/३ लाखदेखि ५ लाखसम्म प्रति रोपनी पर्ने जग्गा खरिदको टुंगो लाग्यो तर चुरो कुरो बाहिर आएको छैन । कसको जग्गाको मूल्य कति भन्ने लुकाइएको छ । सडकसम्म नपुगेको उक्त खेतबारीमा डोजर चलाएर बाटो निकास जोडी जग्गाको मूल्यांकन ह्वात्तै बढाउने गोप्य योजनाका तानाबाना बुनिँदै आएको विशेष स्रोतले बताएको छ । जग्गाधनीसँग एउटा मूल्य तय गरी बैना कागज भैसकेको तर मूल्य बार्गेनिङ गर्न बाटोसमेत जोड्ने खेल भएको बुझिएको छ । 

आयल निगमको जग्गा खरिद काण्ड बिर्साउने गरी फोहोर मैला प्रशोधन केन्द्रको जग्गा खरिद काण्ड अगाडि आउने देखिएको छ । यो सेटिङ सफल हुन दिएमा महानगरपालिकालाई झण्डै ५ करोडको वरिपरि व्ययभार बढ्ने निश्चित छ ।

हाल डोजर लगाएर हतारमा खनिँदै गरेको सडक स्वीकृत योजनामा परेको हो ? बाटो विस्तार अगाडि नै जग्गा प्राप्तिसम्बन्धी कार्य किन टुंग्याइएन ? बाटो जोडेपछि हुने कृत्रिम मूल्य वृद्धिको व्ययभार कसले व्यहोर्ने यी प्रश्नको चित्तबुझ्दो जवाफ खोजेर मात्र खरिद कार्य टुंगोमा पु¥याउन सकिएन भने आयल निगम काण्ड दोहोरिनेमा कुनै शंका छैन ।