छोरी बलात्कार गरेका बाबुद्वारा छोराको हत्या, प्रहरीले यसरी लगायो पत्ता

आफ्नै छोराको हत्या गरेको आरोपमा सुर्खेतमा एक व्यक्ति पक्राउ परेका छन् । छोरीमाथि बलात्कार गरेको अभियोगसमेत लागेका उनलाई भारततर्फ भाग्न लागेका बेला आज बिहान प्रहरीले कैलालीबाट समातेको हो ।    

बिहान करिब १० बजेतिर टिकापुरबाट उनलाई नियन्त्रण लिएको प्रहरीले जनाएको छ । छोरीमाथि आफूले गरेको कर्तुतका विरुद्ध छोरा उभिएपछि उनले हत्या गरेको स्थानीयले बताएका छन् । 

के हो घटना ? 

गत मंगलबार बिहान जिल्ला प्रहरी कार्यालय सुर्खेतलाई पश्चिम सुर्खेतमा एक युवकको लाश भेटिएको सूचना आयो ।  लगत्तै तालिमप्राप्त कुकुरसहित प्रहरीको टोली घटनास्थल पुग्दा लाशको छेउमै युवतीसमेत घाइते अवस्थामा भेटिइन् । शव हेर्दा बिभत्स हत्या भएको अनुमान लगाउन प्रहरीलाई कठिनाई भएन, किनकि मृतकको शरीरभरी धारिलो हतियारले छिया-छिया पारिएको थियो ।

प्रहरीले घटनास्थल वरपर चेकजाँच गर्दा एउटा बञ्चरो पनि फेला पारेको जिल्ला प्रहरी कार्यालय सुर्खेतका एसपी योगेन्द्रसिंह थापाले जानकारी दिए । एसपी थापाले भने, 'मृतकको शरीरभरी हतियारले प्रहार गरिएको थियो । नजिकै एउटा बाख्रा खोर रहेछ । त्यसको पछाडि बञ्चरो फेला पारेका छौ, त्यसैले हत्या गरिएको अनुमान गरिएको छ ।' 

घटना गम्भीर देखिएपछि प्रहरीले मृत युवकको नाम र परिवारबारे खोतल्न थाल्यो । अनुसन्धान अगाडि बढाउँदै जाँदा चार महिनाअघि जिल्ला प्रहरी कार्यालयमा आइपुगेको एउटा बलात्कारको जाहेरीसँग यो घटना सम्बन्धित रहेको प्रहरीले पत्ता लगायो । 

प्रहरीका अनुसार युवकको हत्या उनका बाबुले गरेका हुन् । एसपी थापाले थपे, '४ महिनाअघि हाम्रोमा एउटा बलात्कारको उजुरी आएको थियो । दाजु-बहिनीले आफ्नै बाबुले बलात्कार गरेको भन्दै जाहेरी दिएका थिए । यो घटनाका पनि त्यही घटनासँग जोडिन पुगेको छ ।' 

बाबु मजदुरीका लागि भारत जाने-आउने गर्थे । गत असोजमा दशैँ मनाउन उनी घर आएका थिए । त्यतिबेला उनले आफ्नै किशोरी छोरीमाथि गिद्देदृष्टि लगाए । बाबुले बलात्कार गरेको घिनलाग्दो घटना किशोरीले सहन सकिनन् । विक्षिप्त भएकी उनले सबै कुरा दाईलाई सुनाइन् । 

बाबुले बलात्कार गरेको कुरा सुनेर छांगाबाट खसेजस्तो भएका उनले बहिनीको मेडिकल जाँच गराए । त्यसपछि गत कात्तिकमा बहिनीलाई लिएर जिल्ला प्रहरी कार्यालय सुर्खेत पुगेका उनले बाबुविरुद्ध बलात्कारको कसूरमा जाहेरी लेखाए । त्यतिन्जेलसम्म बाबु भने भारत फर्किसकेका थिए । 

करिब ५ महिनापछि अघिल्लो हप्ता घर आएका उनले आफूविरुद्ध दाजुबहिनीले प्रहरीमा उजुरी दिएको थाहा पाए । त्यसपछि उनले हत्याको योजना बनाएको प्रहरीको बुझाई छ । उनको योजना छोरा-छोरीकै हत्या गर्ने थियो । भाग्यवश ! भागेर बाँच्न सफल भएकी छोरी घाइते भइन् । 

'बाबु अघिल्लो हप्ता घर आएका रहेछन् । मलाई दाजुबहिनी मिलेर जेल कोच्न लागेका हौ भन्दै आफ्नै छोराछोरीमाथि आक्रमण गरेको जस्तो छ । किशोरीको बयानपछि थाहा हुन्छ सबै', एसपी थापाले भने । 

अहिले किशोरीको उपचार भइरहेको छ । आज बिहानमात्र पक्राउ परेका बाबुलाई सुर्खेत लगिँदैछ । एसपी थापाको समन्वयमा प्रहरी प्रदेश कार्यालयबाट प्रहरी निरीक्षक बुद्धि सुवेदी, कर्णाली प्रदेश प्रहरी कार्यालयबाट सई नारायण शर्मा र इलाका प्रहरी कार्यालय बाबियाचौरका प्रहरी निरीक्षक विनोद सुवेदीले घटनाको थप अनुसन्धान गरिरहेका छन्।

अनुसन्धानमा बाधा पुग्ने भन्दै अहिले युवक र बाबुको नाम सार्वजनिक गरिएको छैन । अनुसन्धानको निष्कर्ष आएपछि पत्रकार सम्मेलन गरेर सबैकुरा सार्वजनिक गर्ने एसपी थापाले बताए ।