सुन काण्डमा आरोपितको होटलमा प्रहरीको छापा, सञ्चालककी पत्नी फरार

प्रहरीले ठमेलको पर्यटकीय होटलमा जुवा खेलिरहेको अवस्थामा पक्रेको झण्डै एक दर्जनको नाम सार्वजनिक गरेको छ । ६१ किलो सुनकाण्डमा मुछिएका दावा छिरिङ र उनकी पत्नी अमला रोकाको होटलमा प्रहरीले हिजो छापा मारेर झण्डै १४ लाख रुपैयाँ, चार बुक ताससहित उनीहरुलाई नियन्त्रणमा लिएको थियो ।

ठमेल, ज्याठास्थित होटल भियनाको कोठा नम्बर ६१२ मा जुवा खेलिरहेको अवस्थामा जोरपाटीका अरुण घिमिरे, काभ्रेपलाञ्चोकका हरिबोल खनाल, किशोर अधिकारी, चितवनका दिपक गुरुङ पक्राउ परेका हुन् । त्यसैगरी नुवाकोटका कृष्णबहादुर राई, राजु पन्त, शंकर शाही, रुपन्देहीका घनश्याम शर्मा, रोल्पाका लीला डाँगी, बाँकेका मेदनाथ बुचबन्दिया र गोरखाका अर्जुन गुरुङ पनि प्रहरी हिरासतमा पुगेका छन् ।

उनीहरुको साथबाट १३ लाख ६२ हजार पाँच सय रुपैयाँ र चार बुक तास बरामद भएको छ । जुवाडेहरुमाथि आवश्यक कारबाही प्रक्रिया अघि बढाइएको प्रहरीले बताएको छ । होटल सञ्चालक दावा पनि पुर्पक्षका लागि थुनामा छन् । पत्नी अमला फरार भएकाले प्रहरीले खोजी जारी राखेको छ ।