स्कुटर र मोटरसाइकल बेपत्तामा चाेर समूहको संलग्नता

काठमाडौं उपत्यकाका विभिन्न स्थानमा स्कुटर र मोटरसाइकल चोर्दै आएका चार जनालाई प्रहरीले पक्रेको छ ।  

ललितपुरका विभिन्न स्थानबाट स्कुटर चोरी गरेको आरोपमा काठमाडौंको बल्खु बस्ने मकवानपुरका २८ वर्षीय सनम मगर र २० वर्षीय शैलेश आले पक्राउ परेका हुन् । उनीहरुले ललितपुर महानगरपालिका–१३, नख्खु सनराईज अपार्टमेण्टबाट बा.९७ प ३०२ र गोदावरी नगरपालिका–१३ झरुवारासीबाट बा.९५ प २८०९ नम्बरको स्कुटर चोरी गरेको प्रहरीको भनाई छ । 

प्रहरी वृत्त चापागाउँबाट खटिएको टोलीले शुक्रबार उनीहरुलाई नियन्त्रणमा लिएको हो । जिल्ला अदालत ललितपुरबाट सात दिनको म्याद थपको अनुमति लिई उनीहरुमाथि थप अनुसन्धान गरिरहेको प्रहरीले जनाएको छ । 

यस्तै, राजधानीको गोकर्णेश्वर नगरपालिका–४, माकलबारीबाट मोटरसाइकल चोरीको आरोपमा पनि दुई जना पक्राउ परेका छन् । 

गत शुक्रबार बागमती प्रदेश ०२–०३८ प ०३४५ नम्बरको मोटरसाइकल चोरी भएको घटनामा प्रहरी चौकी भट्टेडाँडा, ललितपुरबाट खटिएको टोलीले अस्ति उनीहरुलाई नियन्त्रणमा लिएको हो । 

पक्राउ पर्नेमा मकवानपुरका २४ वर्षीय छबिलाल बज्युसहित १८ वर्षीय किशोर छन् । उनीहरुलाई थप अनुसन्धानका लागि प्रहरी वृत्त बौद्ध पठाइएको छ ।