प्रसूति गृहबाट चोरिएकी शिशु फेला, तीन जना पक्राउ

थापाथलीस्थित परोपकार प्रसूति गृह तथा स्त्री रोग अस्पतालबाट चोरिएकी शिशु काँडाघारीमा फेला परेकी छन् । जिल्ला प्रहरी परिसर, काठमाडौंका अनुसार शिशु बोकेर गएकी महिलासहित तीन जना पक्राउ परेका छन् । 

हिजो दिउँसो गृहबाट २६ दिनको शिशु चोरेर लगेको अभियोगमा २४ वर्षीया मनिषा सिंह, उनका श्रीमान् र दिदी पक्राउ परेका हुन् । सीसी टीभीमा कैद भएको दृश्यमा मास्क लगाएकी महिलाले शिशु लिएर हिँड्दै गरेको देखिएपछि प्रहरीले खोजतलास गर्ने क्रममा उनी फेला परेकी हुन् । मनिषाका श्रीमान नेपाली सेनामा कार्यरत रहेको बुझिएको छ ।

शिशुलाई प्रारम्भिक उपचारपछि परिवारको जिम्मा लगाइएको छ । शिशु जचाउँन अस्पताल पुगेकी २२ वर्षीया सविना श्रेष्ठसँग ती महिलाले केहीबेर खेलाउन बोकेको र लगत्तै शिशुलाई लिएर फरार भएको बताइन्छ ।

शिशु चोरेर काँडाघारी पुगेपछि मनिषाले छिमेकी र आफन्तलाई आफु सुत्केरी भएको जानकारी गराएकी थिइन् ।