वर्तमान सत्ता गठबन्धन ‘कम्फर्टेबल’ रहेको भारतीयहरुको भनाई

आज दिउँसो एकाएक मुलुकको आन्तरिक राजनीतिमा आएको उतारचढावबीच भारतीय राजदूत नवीन श्रीवास्तवले प्रधानमन्त्री पुष्पकमल दाहाल प्रचण्डसँग भेटवार्ता गर्नुभएको छ । राजदूत श्रीवास्तव प्रधानमन्त्रीसँग भेट गर्न दिउँसो साढे १ बजे प्रधानमन्त्री निवास बालुवाटार पुग्नुभएको थियो  । 

वर्तमान गठबन्धन टुटाउन नहुने सन्देश दिन राजदूत बालुवाटार पुग्नुभएको स्रोतको दाबी छ । उता लैनचौरस्थित भारतीय दूतावास स्रोतले पनि वर्तमान गठबन्धन नटुट्ने विश्वास व्यक्त गरेको छ । स्रोतको भनाई छ, ‘नयाँ दिल्लीले वर्तमान गठबन्धन नै कम्फर्टेबल भएको ठहर गरेकाले गठबन्धन टुट्ने सम्भावना छैन ।’

सत्तारुढ मुख्य दलहरु नेपाली काँग्रेस र माओवादीबीच खटपट र अविश्वास बढिरहेको बेला भएको राजदूतको अप्रत्यासित भेटलाई अर्थपूर्ण मानिएको छ । जबकी आजै बेलुकी ६ बजेदेखि बालुवाटारमा अघिल्लो वर्ष पुस १० अघिको गठबन्धन दलका प्रमुख नेताहरुबीच पनि सघन वार्ता भएको छ । राति १० बजेसम्म भएको छलफलमा प्रधानमन्त्री पुष्पकमल दाहाल प्रचण्ड, एमाले अध्यक्ष केपी शर्मा ओली र महासचिव शंकर पोखरेल, माओवादी उपाध्यक्ष नारायणकाजी श्रेष्ठ र उपमहासचिव वर्षमान पुन सहभागी हुनुहुन्थ्यो  ।

त्यसैगरी छलफलमा रास्वपाका सभापति रवि लामिछाने, जसपा अध्यक्ष उपेन्द्र यादवले पनि भाग लिनुभयो । राष्ट्रिय सभाको आगामी अध्यक्षमा नेपाली काँग्रेसले दावी नछाडेमा जुनसुकै अवस्था आउनसक्ने आकलन गर्दै साँझको छुट्टै भेटघाट गरिएको बताइन्छ ।

बालुवाटारमा एउटा पक्षले सत्ता गठबन्धन टुट्न लागेको प्रचार गरिरहँदा काँग्रेसले भने मन्त्रिमण्डल पुनर्गठनको तयारी गरिएको बताएको छ । यसबीच भोलि बिहान सत्ता गठबन्धनमा आवद्ध दलहरुको बैठक डाकिएको छ । 

तर, रातको १० बजेसम्म बालुवाटारमा सत्तारुढ दल माओवादी र इतर राजनीतिक दलका नेताहरुको छलफललाई राजनीतिक रुपमा अर्थपूर्ण मानिएको छ ।

यसअघि नेपाली काँग्रेसका सभापति शेरबहादुर देउवाले आफ्ना १० जना मन्त्रीहरूसँग एकसरो छलफल गर्नुभएको छ । उहाँले नयाँ परिस्थितिका निम्ति तयार रहन मन्त्रीहरुलाई निर्देशन दिनुभएको बताइन्छ । परराष्ट्रमन्त्री एनपी साउद फिनल्याण्ड भ्रमणमा निस्कन लागेको बेलामा यात्रा रद्द भएको छ ।

यी सबै घटनाक्रम र दौडादौडलाई राजनीतिक विश्लेषकहरुले माओवादीको राष्ट्रिय सभा अध्यक्ष नछाड्ने संकेतको रुपमा व्याख्या गरेका छन् । राति बालुवाटारमा भएको छलफलबाट एमाले अध्यक्ष ओली र महासचिव पोखरेल अरुभन्दा ७ मीनेटपछि निस्कनुभएको थियो । छलफल सचिवालय रहेको भवनमा नभएर निवासमा सुटुक्क गरिएकाले पनि शंका गर्नेलाई बल पुगेको हो ।

‘माओवादीले अध्यक्षको निम्ति अडान राखेको अनुमान गर्न सकिन्छ । किनभने एकथरी नेतालाई गठबन्धन टुट्दा मन्त्रीबाट बाहिरिनुपर्ने डर त्यत्तिकै छ । सबैको आफ्नै पिर भएकाले गठबन्धन टुटाउनेतिर यतिखेर स्वयम् माओवादी देखिँदैन,’ एकजना वामपन्थी विश्लेषकले भने । 

उनीहरुको दौड बालुवाटारबाट अधिकतम बालकोटसम्म भएकाले पनि उक्त निश्कर्ष निकालिएको सहजै अनुमान गर्न सकिन्छ । तर, साँझ बालुवाटारको वार्तामा रवि, केपी र उपेन्द्र एकै ठाउँमा हुनुुलाई भने अनौठो मानिएको हो । सत्ता गठबन्धन फेरबदलमा उपेन्द्रको कुनै प्रत्यक्ष स्वार्थ देखिँदैन । जबकी उनी संघीय र प्रदेश सरकार दुवैतर्फ दुबै हातमा लड्डु लिएको अवस्थामा छन् ।