चिनियाँलाई नेपाली नागरिकता दिएको आरोपमा तत्कालीन नासु पक्राउ

सुन तस्करीमा संलग्न विदेशी नागरिकलाई नेपाली नागरिकता दिएको आरोपमा प्रहरीले एक अधिकृतलाई नियन्त्रणमा लिएको छ । जिल्ला प्रशासन कार्यालय, काभ्रेपलाञ्चोकका तत्कालीन नायव सुब्बा रामचन्द्र अर्याललाई प्रहरीले समातेको हो । 

मकवानपुरको हेटौंडास्थित बागमती प्रदेशसभा सचिवालयमा कार्यरत छैठौं तहका अधिकृत अर्याललाई हिजो पक्राउ गरिएको जिल्ला प्रहरी कार्यालय, काभ्रेले जनाएको छ । काभ्रे प्रहरीको अनुरोधमा जिल्ला प्रहरी कार्यालय, मकवानपुरले उनलाई पक्राउ गरेको हो । 

अर्याललाई मकवानपुरबाट काभ्रे ल्याइसकेको प्रहरी नायव उपरीक्षक (डिएसपी) राजकुमार श्रेष्ठले बताए । उनीमाथि काभ्रेमा रहँदा चिनियाँ मूलका बेल्जियम नागरिक दावा छिरिङ्गलाई नेपाली नागरिकता दिलाउन सहयोग पुर्याएको आरोप छ । 

श्रेष्ठले भने,‘उहाँलाई हिजो पक्राउ गरिएको हो । अहिले उहाँ हाम्रो हिरासतमा हुनुहुन्छ । उहाँमाथि अनुसन्धान भइरहेको छ ।’ दावाले नेपाली नाम निमा तामाङका नामबाट २०७४ पुस २० गते नमोबुद्ध नगरपालिका ठेगाना राखेर नेपाली नागरिकता लिएका थिए । उनले नागरिकता लिने बेलामा अर्याल नासु थिए । सरकारले दावाको नेपाली नागरिकता खारेज गरिसकेको छ ।