युवकको कम्मरमा एक किलो सुन, युवतीको झोलामा २१० ग्राम

संयुक्त अरब इमिरेट्सको दुबईबाट काठमाडौं आएकी एक युवती त्रिभुवन अन्तर्राष्ट्रिय विमानस्थलमा सुनसहित समातिएकी छन् । प्युठानको ऐरावती गाउँपालिका–६, घर भएकी २८ वर्षीया संगिता परियारलाई प्रहरीले सुनसहित पक्रेको बताइएको छ । 

फ्लाई दुबईको उडानमा काठमाडौं आएकी उनको साथबाट दुई सय १० ग्राम सुन फेला परेको प्रहरीले जनाएको छ । भन्सार छलेर लैजान लागेको अवस्थामा परियारको साथबाट सुनको एक थान सिक्री, एक थान ब्रासलेट, तीन वटा औंठी, एउटा रानीहार, एउटा मिनीहार, दुई वटा मंगलसुत्र र दुई जोर कानमा लगाउने झुम्का बरामद भएको हो । 

हिजो पक्राउ परेकी उनीमाथि भन्सार कार्यालयले आवश्यक अनुसन्धान तथा कारबाहीका अघि बढाएको छ । उता सिन्धुपाल्चोकमा पनि एक किलो सुनसहित एक युवक पक्राउ परेका छन् ।

भोटेकोशी गाउँपालिका–५, मार्मिङ बस्ने २३ वर्षीय थारचेन तेम्बा तामाङलाई इलाका प्रहरी कार्यालय बाह्रबिसेबाट खटिएको टोलीले हिजो साँझ बाह्रबिसे नगरपालिका–३, खुर्सानीबारीबाट सुनसहित नियन्त्रणमा लिएको हो ।

भे.११ प ५५५८ नम्बरको मोटरसाइबल चेकजाँच गर्ने क्रममा तामाङले आफ्नो कम्मरमा बाँधेर ल्याएको अवस्थामा सुन फेला परेको प्रहरीले जनाएको छ।