प्रचण्ड सरकारलाई भोट दिन हानथाप गर्नेहरु प्रदेशमा काँग्रेसतिर

प्रधानमन्त्री पुष्पकमल दाहाल प्रचण्ड नेतृत्वको संघीय सरकारलाई विश्वासको मत दिएको नागरिक उन्मुक्ति पार्टीले प्रदेशमा भने फरक निर्णय गरेको छ । 

प्रधानमन्त्री प्रचण्डलाई विश्वासको मत दिने विषयमा भएको आन्तरिक विवादले झण्डै विभाजनमा पुगेको सो पार्टीका बहुमत प्रदेशसभा सदस्यले सुदूरपश्चिम सरकारलाई दिएको समर्थन कायम राख्ने निर्णय गरेका छन् । पार्टीको प्रदेशसभा संसदीय दलको आजको बैठकले त्यहाँको काँग्रेस नेतृत्वको सरकारलाई सघाएर जाने निर्णय गरेको नेता घनश्याम चौधरीले बताए । 

सुदूरपश्चिम प्रदेश सभामा नाउपाका सात सांसद छन् । बैठकमा पाँच जना उपस्थित थिए । अनुपस्थित दुई जना सरकारमै रहेकाले उनीहरुको पनि निर्णयमा सहमति लिइएको बताइएको छ । 

संघमा नयाँ गठबन्धन बनेसँगै माओवादी केन्द्र र एकीकृत समाजवादीले समर्थन फिर्ता लिएपछि मुख्यमन्त्री कमलबहादुर शाह अल्पमतमा छन् । सरकार जोगाउन उनले सात सांसद रहेको नाउपाका चार जनालाई मन्त्री बनाएका हुन् । तर, मुख्यमन्त्रीले विश्वासको मत पाउने गणित भने अझै प्रष्ट भइसकेको छैन । 

यसअघि प्रधानमन्त्री प्रचण्डलाई विश्वासको मत दिने कि नदिने भन्नेमा अध्यक्ष रञ्जिता श्रेष्ठ र पार्टी संरक्षक रेशम चौधरीबीच चर्को विवाद देखिएको थियो । अन्ततः प्रधानमन्त्रीलाई विश्वासको मत दिने रञ्जिताको लाइनमा उभिएको नाउपाले प्रदेशमा भने रेशमको चाहनाअनुसार काँग्रेस कित्तामा उभ्याएको हो ।